Prabebs 30:4-20

⁴“Wal enibodi bin gowap langa hebin en kambek igin? Enibodi bin holdim det win langa im bingga? Enibodi bin majurrumap ola woda brom solwoda en makam ola bandri blanga ola graun langa dijan wel? If yu sabi enibodi hubin dum dislot ting wal yu dalim mi. Dalim mi olabat neim en olabat biginini neim.

⁵“Ebrijing God bin tok im trubalawan. En God im maindimbat detlot pipul hu kaman langa im blanga jidan seifwan.

⁶Nomo tjeinjim wanim God bin tok. If yu tjeinjim detlot wed im garra panishim yu en shoum ebribodi yu laiyinbala.

⁷“Wal ai garra askim yu na God blanga dum dubala ting blanga mi bifo ai dai.

⁸Yu meigim mi jidan brabli trubalawei, en yu nomo larram mi jidan brabli ritjwan o brabli powan, bat jis gibit mi naf daga ebridei.

⁹If ai abum tumatj daga ai mait fogedabat yu. If ai nomo abum naf daga ai mait go stilimbat en bringim sheim langa yu neim.”

¹⁰Yu nomo tok nogudbalawei blanga eni wekinmen langa im bos. If yu dum lagijat det wekinmen garra askim God blanga meigimbat trabul langa yu en yu garra abum bigiswan trabul.

¹¹Sambala pipul askim God blanga meigim trabul langa olabat dedi en mami.

¹²Sambala pipul reken dei brabli gudbala, bat dei nomo jidan fri brom ola nogudbala ting weya dei oldei dumbat.

¹³Sambala pipul oldei reken dei jidan brabli gudbala, bat dei oldei jidan brabli praudbalawei.

¹⁴Sambala pipul jidan brabli gridibala en dumbat krulbala ting langa ola po pipul en langa detlot pipul hu nomo abum eniweya blanga silip.

¹⁵Det gridibala garram dubala doda en det dubala garram seim neim, “Gibit Mi”. Wal dislot fobala ting nomo jidan sedisfaid. Olabat na

¹⁶det greibyad, det wuman hu kaan abum biginini, det graun weya wandim rein, en det faiya weya kipgon barnbarn.

¹⁷If yu meigimbat fan blanga yu dedi, en if yu nomo abum rispek blanga yu mami, detlot kro garra deigimat yu dubala ai en detlot igulok garra kaman en dagadagatbat yu bodi.

¹⁸Ai kaan sabi dislot fobala ting. Olabat na

¹⁹hau detlot igulok oldei flaiflaibat ontop langa skai, hau detlot sneik oldei kraulkraulbat ontop langa ola ston, hau detlot bout faindim olabat wei langa solwoda, en hau boi en gel oldei laigim gija.

²⁰Det waif hu oldei silipsilipbat garram det men hu nomo im hasbin, im oldei tok, “Wen mi silip garram naja men, ai nomo dum enijing rong.”