LEPIN PADAHK AUDAPAN KAN 30:4-20

⁴Ihs me aledier kupwurokong en nanleng? Ihs me koledier kisinieng nan peh? De koarukihpene pihl nan kisin mwein likou? De koasoanehdi irepen sampah? Ihs ih, ma ke ese? Ia sapwellime pwutaken?

⁵“Koht kin ketin kapwaiada inou koaros me e kin ketin wia. E rasehng mehn sansar ehu ong irail kan me kin rapahki sileparail pahn kupwure.

⁶Ma ke koasoia me e mahsanih mehkot me e sohte mahsanih, e pahn ketin kapwung ong uhk oh ketin kasalehiong uhk me kowe aramas likamw.”

⁷Maing Koht, I peki rehmwi soahngte riau, komw ketin mweidohng ie mwohn ei pahn mehla:

⁸komw ketin kadohwaneweisang ie likamw, oh I en dehr wiahla aramas kepwehpwe de semwehmwe. Eri, komw ketikihong ie uwen kisin tungoal me I anahne.

⁹Pwe ma e daulihala, mweinele I pahn patohwan me I sohte anahne komwi. Ahpw ma I semwehmwe, mweinele I pahn pirap oh kasaminehla mwaren ei Koht.

¹⁰Dehr kedipa ladu men rehn eh soumas. Pwe ke pahn riahkihla oh alehki lokolok.

¹¹Mie aramas me kin peinediong ar pahpa kan oh sohte kesempwalki ar nohno kan.

¹²Mie aramas me kin lemeleme me re mwakelekel nan ar samin kowahlap.

¹³Mie aramas me kin lemeleme me re inenen mwahu—eri, ia uwen arail mwahu me re lemeleme!

¹⁴Mie aramas me kin kahpwalihala me semwehmwe kan oh me paisuwed kan ni tiahk en lemei; ihme re kin wiewiahki ar mehn mour.

¹⁵Soangen kisin mahn kis me kin mihkasang nta naineki serepein riemen, eri, ira koaros adaneki “Kihdo!” Mie soahng pahieu me sohte kin itarki dahme mie rehrail:

¹⁶wasahn me melahr akan, Lih depwen men, sapw madekeng me kin anahne keteu, oh kisiniei me luldahr solahr kak katoktokdi.

¹⁷Mehmen me kin kapailoke seme de mwamwahlikihla ine ni ara likeilapalahr, e konehngete menpihr kan en kangala de menpihr kommwad akan en palihasang pwoaren mese kan.

¹⁸Mie soahng pahieu me uhdahn rir ong ie I en wehwehki:

¹⁹ikel men me pipihrseli pahnlahng, sineik men me limwilimwahdek pohn takai ehu, sohp pwoat me kak seiseiloakseli nan madau, oh ohl emen oh lih emen ni ara kin limpoak pene.

²⁰Iet duwen dahme lih pwopwoud men me kin kamwahlih eh pwoud kin wia: mwurin eh kin kamwahl, e kin duhduhla, oh nda, “Sohte mehkot sapwung I wiahda!”