Prabebs 26:20-27

²⁰If yu nomo garram wud, det faiya kaan barn, en if yu nomo dalimbat laiya, det agamin stap.

²¹Detlot trabulmeika oldei stadimap trabul, jis laik lilwan faiya stadimap bigwan faiya.

²²Wen sambodi irrimbat eni yan im meigim im wandi irrimbat mowa, jis laik wen yu dagat shugabeig yu wandim dagat mowa.

²³Detlot pipul hu oldei jinggabat pipul nogudbalawei bat oldei tok garram kainwan wed, dei jis laik wen sambodi pudum purdiwan peint langa rabishwan dish.

²⁴If enibodi hu tok gudwan wed langa yu bat im nomo laigim yu en im jinggabat ola nogudbala plen langa im main,

²⁵wal yu kaan bilib langa im wed en yu kaan kaundimap ol detlot nogudwan plen im garram.

²⁶Maitbi im gaburrumap det nogudwan filing im garram blanga yu, bat bambai ebribodi garra luk ol detlot nogudbala ting imbin dumbat.

²⁷Enibodi hu grajimbat det graun blanga meigim hol blanga trepam najalot pipul garra buldan langa det hol miselp. Enibodi hu stat blanga rolim bigwan ston garra git ranoba garram det seimwan ston.