Pogsiognang 8:14-35

¹⁴Yesusti wepto pogsiognang as Yerusalema ka'elamekpa, “Mog so'o Samaria wamang nimiri Allah yubu ka'elamangdi, Yesusag 'Sikne' aro seneraglamang,” ana ka'ebaekti, Petrusap, Yohanesap wepto pogsiek.

¹⁵Petrusap Yohanesap anam yan komag agha, Filipusti ambarelamsiogti, “Si Yesus engeropneag 'Sikne' aro seneragmunba, Yesusti saelbamsilul,” aro Samaria nimi maghag pelengkipsiog. Maghag pelengkipsiog aghana Allah Eldamne Yame Walinge Samaria nimi nhonag babe pelengel aog kom. Ane sembe Petrusap, Yohanesap pogsiekpa, Samaria pirekti, Samaria nimi usoghag sae saelbamsirekti, Allahag mololamdekti, “Andamne Yame Walinge sin Samaria nimi taneag tatsululam,” aro molona molbarek. Wene aro molbarekpa, Allahri Eldamne Yame Walinge sin nongag palilamsiog.

¹⁸Yesusti wepto pogsiognangdi nimi usoghag sae pipsiekpa, Allahri Eldamne Yame Walinge sin nongag palilamsiogpa, Simon ponekori kembahiog. Kembahiogti Yesusti wepto pogsiognangag kal ma'al payaogti, Simon ponekori yubu lelamogti, “A'undi nimi usoghag sae palilamsiromba, Allahri Eldamne Yame Walinge nimi tane nongag palilamsil. A'undi ulamdomne saog uro nari babe uanun. Kal ma'al ane tatsineba, mikipne ane tatnurumunba, nimi usoghag nari sae palilamsineba, Allahri Eldamne Yame Walinge nimi nongag palilamsilul,” seog.

²⁰Wene seogpa Petrusti, “Allahri, 'Mo tatsinun,' senelamlange nene andina 'Kamna kal ma'alag kapto tomnep,' senelamlam, te? Senelamlamne ane sembe anap anenge kal ma'al eneap tebalulam!

²¹Andi wanaag Allahri seneragna sunsunum uro seneraglamlam kom. Ane sembe nuri sae nimi usoghag palilamsiapne, olog babe tam andinge tanep kom.

²²Allahri anap, andinge kal ma'alap kom nembaghenep ane sembe, malia ualamne nene wali uro seneragmendi lipsululam. Lipsimendi, 'Malia uanne tam orog nembalulam,' aro Nuni Allahag mololapmenba, 'Malia wanaag seneraglamlamne nene Allahri tam orog nembalul to, kom to?' aro mololame.

²³Andi wanaag seneraglamlamne sembe na el tan. Andi wanaag yonge meso pungkulamlaba, andi mali-malia ulamlamneri wana sao kauplangkelba, ulamlam,” seog.

²⁴Wene seogpa Simondi sin phendeag yubu lelamogti, “A'undi leptomne nanag taleagti, a'undi na sembe yepto A'uni Allahag molbarurom,” seog.

²⁵Seogpa, wameka, Petrusap Yohanesapti, “Allahri nimi el uro ua unne kekneba Yesus sembe maikno ulamogpa, ibubu,” aro Nuni Allah yubu ambarelamsirekti, as Yerusalem samoro yalamdek. Yalamdekti mog so'o Samaria as maikno wa'iro yubu walinge Yesus sembe ambare-ambare Yerusalem yarek.

²⁶Petrusap Yohanesap as Yerusalem yarekti, wamdekpa, sikinkae Filipus Samaria mog so'oag wamog. Wamogpa, Nuni Allahri Eldamneri arukna malaikat nhon poghol aogne Filipus Samaria mog so'oag wamoghag piog. Piogti, Filipusag yubu lelamogti, “Sekmendi, Yerusalem simbik pimendi, ina as Yerusalema as Gaza kuluptop ina waghag pululam. As Yerusalem anabi as Gaza anabiag ina pai aldes saoghag wamlange nene toman pululam,” seog.

²⁷Wene seogpa Filipus sekom agha piog. Piogti tilamogpa, Etiopiange nhon nimi nubunge yalamog. Mog so'o Etiopia nimi yubu sia lerop kel si Kandake arukna wamogti, Kandake kel eneringe sae agha piamogne yalamog. El neneko as Yerusalem Allah omekel piogti, samoro yalamog.

²⁸Samoro yalamogti, kereta alibag pukamogpa, pham kudari kiliro payalamog. Kereta alibag pukamogti, mome Yesaya Allahri yubu silimu tiptopneri mome tobogne Etiopiangeri eldi saeag saelbamogti, keme-keme yalamog.

²⁹Keme-keme yalamogpa, Allah Yame Walinge nenekori Filipusag, “Elem-elem pimendi, pham kudari kereta kiliro payalamla peramag ane pululam,” seog.

³⁰Wene seogpa, Filipus elem-elem kereta yalamogha peramag piogti, ka'elamogpa Allahri yubu silimu tiptopne Yesayari mome toro pibogne Etopiangeri kemero lelamogha Filipusti ka'ebaog. Ka'ebaogti, “Nani, yubu leple yalamlam yubu ene wanaag olog el talam te?” aro haibaog.

³¹Haibaogpa nimi nubunge ponekori, “Nimi amoro el nenehin nang orog wamnaba, welaro el tanep?” seog. Wene seogti Filipusag, “Walel amenba, nhon pununam,” aro molbaogpa, Filipus neneko kereta alibag waelbaogti, Etopiange peramag pulingkiog.

³²Yesayari mome toro pibogne leple yalamogne lilimna ane: “'Pham domba obukap,' aro pabirop saog uro El babe pabiek. Nimiri pham domba hong kareplamangba, pham domba yubu lemna kom ua urop saog uro, El babe yubu koma wamogpa obek.

³³El nimiri ali nenero yubu lero loloroba lelamekpa, tam Elag taog. Elag tam pibekne wali uro kemban koma El ya'ag obekpa, tebaog. Tebaogne sembe, Nimi nhondi babe 'Eldi mabo tane wamang,' aro lemnep kom,” aro mome toroba leple yalamog.

³⁴Etiopiange ponekori Filipusag hailamogti, “Nari anag hailangkenne, Allahri yubu silimu tiplamogne poneri etne sembe mome toro pibogti lebog? Eldamne sembero, nimi orange sembero?” seog.

³⁵Wene aro haibaogpa, Filipusti leple yalamogne neneko Yesayari mome toro pibog yubu aneko sirik kiliro yubu walinge Yesus sembe tibin nenero ambare-ambare palamog.