Los HECHOS de los apóstoles 8:14-35

¹⁴Ajcüwa apóstoles monlüy Jerusalén, wüx tanguiayiw nipilan monaw Samaria lamayariw Mipoch Teat Dios, quiaj tüjchiw mamb a Pedro maquiiüb a Juan mambüw quiaj, mambeolüw a Felipe.

¹⁵Nejiw wüx tapeayiw quiaj, tatüniw ocueaj Teat Dios müüch Nangaj Espíritu ajcüwa nipilan quiaj.

¹⁶Cos nejinguind tiül nejiw nganaw mayariw Nangaj Espíritu ocueaj Teat Dios. Nejiw tayariw áagan yow wüx minüt Teat Jesús.

¹⁷Quiaj a Pedro y Juan tayacüw owixaw wüx omalüw ajcüwa nipilan quiaj, quiaj tiün wüx ombasüw nejiw Nangaj Espíritu ocueaj Teat Dios.

¹⁸Aaga Simón wüx tajaw nguineay ajcüwa apóstoles ayacüw owixaw wüx omalüw nipilan, quiaj apeay wüx ombasüw nejiw aaga Nangaj Espíritu ocueaj Teat Dios. Quiaj tandiüm müüch nejiw tomiün.

¹⁹Tasaj nejiw: ―Ijchan xic aton narang aag ayaj, nüjchiw mayariw Nangaj Espíritu ocueaj Teat Dios jangantanej nipilan leaw sanayac xiwix wüx omal nej ―aj nejiw.

²⁰Quiaj tasaj nej a Pedro: ―Ijoy ninguiün aaga tomiün quiaj, ich ndrom imbas anaag, cos ique tendiüm mengal aaga leaw Teat Dios üüch, ǘüchan.

²¹Ique ngo matüch ic meaand aag ayaj, ngome minajiüt, cos Teat Dios ajaw imeaats ngome najneaj.

²²Nganüy icueat aaga xeyay ngo majneaj temerang quiaj, itün ocueaj Teat Dios sitiül alndom mawün wüx omeaats aaga xeyay ngo majneaj ipiüng tiül imeaats quiaj.

²³Xique sajaw ique xeyay ngo majneaj alwüx imeaats. Ijlüyay wüx irang ngo majneaj ―aj nej.

²⁴Quiaj tasaj nejiw a Simón: ―Itüniün ocueaj Teat Dios mambeol xic, ngana namongoch aaga ipiüngan quiaj ―aj nejiw.

²⁵Condom a Pedro y Juan, wüx landoj majüiquichaw wüx Teat Jesús, at wüx landoj mandeacüw Mipoch Teat Dios, quiaj tandilileaw alinomb andüyiw Jerusalén. Xeyay cambaj tiül Samaria leaw niüng tamongoj, tasajüw nipilan wüx Mipoch Teat Dios.

²⁶Condom nop ángel ocueaj Teat Dios tasaj a Felipe, tapiüng: ―Ernguialeateay, quiür indüy cawac, ingoch aaga tiiüd imiün Jerusalén andüy Gaza. Aaga tiiüd quiaj, amb tiül wajchiüc among ―aw.

²⁷Quiaj tamb a Felipe. Ndoj tangoch nop naxey naw tiül iüt Etiopía, eunuco nej, pero ajiür nadam najiüt ocueaj nop najtaj nenüt Candace. Aaga najtaj quiaj minatang nenajiüt nej tiül iüt Etiopía. Aaga naxey quiaj, acül teowix nej meáwan tomiün. Nej tamb Jerusalén marang casa Teat Dios.

²⁸Wüx tajtsor alchetem tiül micarret nej, tenguial mateow Mipoch Teat Dios tiül aaga nawiig tarang Isaías, nendeac andeac Teat Dios.

²⁹Quiaj Nangaj Espíritu ocueaj Teat Dios tasaj a Felipe: ―Quiür itüch aaga carret quiün, indüüb mamb ―aj nej.

³⁰Quiaj tamb a Felipe matüch a carret. Tanguiay aaga naxey quiaj tenguial mateow Mipoch Teat Dios leaw tarang Isaías. Tatün manguiay, tasaj: ―¿Teat, ixom imeaats wüx aag temeteow quiaja? ―aj.

³¹Quiaj tapiüng aaga naxey: ―¿Nguineay sanaxom ximeaats sitiül ngo majlüy aljane maquiaach xic? ―aw. Ndoj quiaj tasaj a Felipe majtep tiül a carret chetem aweaag.

³²Aaga Mipoch Teat Dios niüng tenguial mateow, apiüng: Wüx taquiüraab mamb mandeow, ajlǘyan ngo menojteay, atnej nop sap. Atnej nop quicheech sap wüx ajerep milan nej, ngo mepaj. Atquiaj a nej aton wüx tandeow, ngo majcüy majaw monbiy nej.

³³Nej tüünd mamongoch monxing, ndoj ngome tajaraw cuane asoet. ¿Jane alndom mapiüng meáwan ngo majneaj tarangüw wüx ombas nej ajcüwa nipilan quiaja? Cos tambiyaw nej ningüy wüx iüt.

³⁴Quiaj tatün manguiay aaga naxey quiaj, tasaj a Felipe: ―Isaj xic teat, ¿jane wüx ombas apiüng aaga nendeac andeac Teat Dios quiaja? ¿Apiüng wüx nejáyan quiaja, ngwüy apiüng wüx alinop aljane? ―aj.

³⁵Condom Felipe tapots maquiaach nej ajan wüx aaga poch quiaj. Tapots masaj nej wüx Mipoch Teat Dios leaw tandeac Teat Jesús.