Pisalem 55:3-18

³Au gu madagu huoloo i nia lee haga madagudagu dangada o ogu hagadaumee. Au gu beehi go digau huaidu ala e hai au haga huaidu. Digaula e gaamai gi di au di haingadaa; digaula e hagawelewele mai gi di au, ge hagadugina ginaadou au.

⁴Au gu madagu huoloo, di madagu o di made gu daamaha i ogu lodo.

⁵Di madagu mo di bolebole guu honu i ogu lodo. Au gu madagu huoloo.

⁶Au bolo gii hai hualaa ogu bakau be di mwuroi, gi maangi au gi daha, gii gida dogu gowaa e hagamolooloo iei au.

⁷Au ga maangi gi mogowaa loo, gaa hai dogu guongo i lodo di anggowaa.

⁸Au ga halahala dagu gowaa hagalimalima e bala iei au i di madangi damana mo di madangi gono.

⁹Meenei Tagi, hagahinihini ina nia helekai o ogu hagadaumee! Au e mmada gi nia daangada e hai be digau e dadaaligi nadau daangada, ge hagalongoaa i lodo di waahale.

¹⁰Boo mo aa nia haihai huaidu e hula e haganiga i hongo di abaaba di waahale deelaa, e haga honu di maa gi nia huaidu llauehe mono haingadaa llauehe.

¹¹Di haga mooho la i nia madagowaa huogodoo. I hongo nia ala guu honu i nia halahalau mo nia hagahuaidu.

¹²Maa nei bolo di hagadaumee e haganneennee au, gei au e manawa balabala hua ginai, gei di maa di hoo ni oogu ma ga haga balumee au, gei au e mee di hana gi daha mo mee.

¹³Gei di maa kooe dela go dogu ihoo ngalua mo dogu ihoo hagaaloho donu.

¹⁴Gidaua nogo hagabooboo i tau mehanga i di aloho, nogo daumaha i di gowaa e dahi i lodo di Hale Daumaha.

¹⁵Heia ogu hagadaumee gii mmade i mua nadau madagoaa belee mmade ai. Digaula gi hula hua mouli gi lodo tenua o digau mmade! Di huaidu la i lodo nia hale digaula mo i lodo nia manawa digaula.

¹⁶Gei au ga gahigahi Dimaadua go God belee hagamaamaa au, gei Mee ga haga dagaloaha au.

¹⁷Luada, oodee, mo hiahi agu tamu mo di dangi i lodo dogu manawa guu dau i mua o Mee, gei Mee ga hagalongo gi dogu lee.

¹⁸Mee ga laha mai au hagahumalia gi daha mai teebagi dela nogo heebagi iei au gi ogu hagadaumee dogologowaahee.