Salmo 55:3-18

³Din kalaban ko yan bomogbogaw da, emegyatak sin pangeg-egyat da. Pomalpaligat da ya omililiget da.

⁴Palalo ay madandanaganak, emegyatak si kateyak.

⁵Palaloy egyat ko et manpayegpegak.

⁶Mo kamanak koman kalapati ta way payak ko, tomayawak ay man-anap si pantalnaan di nemnem ko.

⁷Tomayawak ay omaddawi ta enak mantetee sin lugar ay magay omili.

⁸Dalasek ay man-anap si pansidomak gapo sin napigsa ay dagem ya pewek.

⁹Apo, iturong mo koma ta adi da mankikinaawatan si kali da. Tan di mailak sin siyodad et siya na: palpaligaten da di iib-a da ya golo di am-amagen da.

¹⁰Inag-agew ya linablabi ay likelikeden da, kedse ya problima di am-amagen da sin amin ay soli na.

¹¹Panangdadael di maam-amag sin siyodad ay sana, sin kakalsada, ad-adoy sowitiken ya paligaten da.

¹²Mo kalaban ko di lomaslasoy, anosak koma. Mabalin abe ay ilisiak daida.

¹³Ngem din nangamag isna et esa ay gayyem ya kabsat, esa ay ib-a.

¹⁴Ed idi, mayat di panagkadwa mi ay dowa, sin Timplo yan mandaydayaw kamin sik-a.

¹⁵Masapsapa koma din kalaban ko ay matey. Emey da koma ay sibibiyag sin kad-an di natey, tan mo daida, kaman dan panbeeyan di lawa, pag lawa di nemnemnemen da.

¹⁶Ngem mankedawak si badang mo et omisalakan ka.

¹⁷Inagsapa, minasdem ya linablabi, Apo, ay dengngem din adawag ya bayeweng ko.

¹⁸Mantitinolong din ad-ado ay kalaban ko, ngem omisalakan ka et adiak maan-ano.