Ol Provep 4:2-15

²Agaa neme go lagialo-re epeta-ga, nimimi narubalepape. Pa yae kone sua rubalimi raburi nimi omalimi.

³Nina amame naaki meda abi namadini ni komea madu isa-pulu, nipumi ni madaa raana omea.

⁴Gore ni oge naaki pirano aapa nipumi ni agaa mana gupa lagisa. Nina agaa nena kone-para waru mea sua go agaa ratape sa. Goa pali rabu ne ora epe-rupa piru diayali sa.

⁵Neme epe kone mua kone-para mea rubina lape. Neme naa agaa mea rubebe pua kone narugulape.

⁶Dia neme epe kone nagimape. Go agaame ne epe-rupa surubalia rabu ne ora epe aa pirali.

⁷Gore neme aba ripia mealiare epe kone ora riri-nane meape. Neme oyae medaloma meaayo kone saliri epe yaere epe kone yade.

⁸Neme epe kone raaname omoa irulu sabaali raburi, go epe kone-me ne adaa bi gialia. Go rabu ne ora epe aa pirali.

⁹Goa pua nena aalu mada king aa mudu medana raguna nona piene adipua aali.

¹⁰Go naaki neme nina agaa pagoa ratali rabu ne go su-amaa oro yalo adaalu-pu piruali.

¹¹Neme ne epe pora mea waloa epe pora-nini painalo maredepo yaayo.

¹²Gore ne go pora ratua paali rabu oyae medame mada nama-oyaalia.

¹³Ne oroyalo pirama lama pope agaa-re, nina agaa ya-pulu ratali rabu go-para ia agaame ne waru surubalia.

¹⁴Neme wae aanuna agaa gimoa nimuna pulalo palimide-anu page gimape.

¹⁵Neme go pora gimoa pogola pua su-adaalu meda-nane pope.