Ol Provep 18:5-18

⁵Aa meda wae pupitagi noa koso madaa aaliare go aana koso rabamu laata ne napope. Gore mo aa nipu koso mada nawini pina rabuaatape.

⁶Epe kone na-i aamere pa onaa raapu yada agu pulalo pea. Goa pua nipuna agaa pageme rabu otada nipu page tulalo peme.

⁷Kone waru na-i aa medame agaa tea-dare nipuna go agaame nipu ma-oyaaya. Gore nipuna maa-para yapa-lokena pogaa mada sua maraawa nipu omalia.

⁸Aa medana maa agaa paema rabu go agaa pagape madaa raaname waru omeme. Go agaare epe redepi-rupa meda yapulu aipapulu pagoa eta mada mea neme.

⁹Wae kiaa rakepene aare nimuna bipa nipu ma-oyaya. Goa pua nimu kiaa rakepea wae-rupa pimi.

¹⁰Adaa Aa-re puri pabe ada-rupa aaya. Epe redepone aanu nimu go adapara aloma puaa gopara pua piruaeme.

¹¹Amone aanu nimuna moneme nimu kutapua ora epe-rupa surubalia kone imi. Mo ada kagure puri-palo aya-rupa mada kone imi.

¹²Gore aa meda nipu pupitagi noa nipuna bi minasaliare orope nipu oyalia. Nena bipa ne rabu aniawa epe pora narataliri ne epe adaa bi mada nameali.

¹³Aane waru lobapaina pirua agaa aba waru pagoa orope agaa abulape. Neme goa napaliri wae maeyae kone sua pe-pulu orope ne yala pote.

¹⁴Aa meda nipu yaina omoa yapare kone puri paboa piraliare go yaina mada perekealia. Mo aa nipuna kone oyaliare go aa nipuna kone wala akepua ma-epeaalia pae?

¹⁵Aa meda nipumi epe kone sua nipumi oyae rado rado waru makuaatalo pea yae luabu waru makuaaya. Go page aa medame agaa mana teme rabu nipumi aane lobapa ina pirua mogo agaa rayo waru pagea.

¹⁶Gore neme adaa aa meda raapu agaa talo pali-daare neme nipu pa ode kalape yae meda aba ripinape. Goa pali raburi neme nipu mada adali.

¹⁷Aa meda nipu kosona ini-agaa madaa aawa agaa teare nipu koso wini pape nonapiaene agaa tea. Go yapare pa aa meda agaa waru maredepo yainalo agaa mealia-dare go koso apimi wini palia palo marea.

¹⁸Aa laapona rikiraane koso aapimi ora wini palialo abi nalapaeme raburi apimi wini palia pala marea teme.