Muqâqiŋ Dâŋ 18:5-18

⁵Ŋic sindaŋne âgo ejarehuc ŋic bahacmâc jaŋere dâŋ muhasickepene mi sâckeocmu.

⁶Ŋic mutuc matacnezi fuŋkerâ dâŋ mu qaqatarac ehuc ʒika hotâckeocmu.

⁷Ŋic mutuc matacnezi dâŋ muhuc juju‐ticne sipirickeekac, e jahacne dâŋzi bitiŋ ecneha raʒime kiekac hâcne.

⁸Ŋic nâŋâc gupe micko âkec dâŋ irec manapene aŋacne eha maŋnâŋecko râepene hurâ foekac.

⁹Ŋic ojoŋ juekac â ŋic wiac ima baekac jahe sâcjekic mocjaha.

¹⁰Anuture dâŋ i huec sanaŋ iŋucne, irec ŋic tiŋnezi ira ferâ wamao sâcne ŋec foc eocmu.

¹¹Ŋic gâcne jaŋe moneŋ mafa wiac‐jeŋicte manapie haesac sanaŋ ʒoricne irec sâc ehuc ŋezic‐nâpokac tinac eekac.

¹²Ŋic maŋhuhuŋ jueŋgopieŋ jaŋere manapene fefene eekac, â ŋic pepec penaroŋhec jaŋe ine sisipiricte hatao raeŋgopieŋ.

¹³Go qanaŋ dâŋte hazec râezemec izi ʒâhec dâŋ okacne bâtikiezemec, go iŋuc mi ecmuo ine mutuc erâ mimi faio fecmu.

¹⁴Ŋic moc e jujure ʒoɋac focneocmuzi huc ʒâic fuacneme sâcne qamaseocmu, â ʒoɋac‐ticne omaeme ie maŋticne gâcke‐fâreocmu.

¹⁵Ŋic mamana sarichec jaŋe dameŋ sâc mamana ʒuhuckerâ roniŋte afeckerâ giene baeŋgopieŋ.

¹⁶Go ŋic ʒâŋe biŋe sâkohec ere maio fuazo murâ ine bubiaŋte wiac moc afeckerâ bacne razemec.

¹⁷Ŋic moc e dâŋgieo dâŋticne fuŋkerâ mume manapie fârine eekac, izi ʒâhec ine kisâ‐ticnezi ŋifecne mume fâri tâmiric eekac.

¹⁸Ŋic jajahec ʒâŋe biŋe sâkohec jahe dâŋgieo dâŋ mu qaqatarac epire ɋâsâi qapie dâŋjekicte fuŋne taniŋkeekac.