Numperis 20:8-19

⁸“Kopwe angei ewe wok mi nom ren ewe pworofel o emwichato ekewe aramas meinisin, ämi me Aaron pwiüm we. Oupwe fos me fän meser ngeni ewe achau pwe epwe atowu kolukun lon. Iei usun kopwe atowu koluk seni lon ewe achau fän iter, pwe kopwe aünü ekewe aramas me nöür man.”

⁹Iwe, Moses a angei ewe wok usun ewe Samol mi Lapalap a allük ngeni.

¹⁰Iwe, Moses me Aaron ra emwichafengeni ekewe aramas meinisin mwen ewe achau. Iwe, Moses a üreniir, “Oupwe rongorong, ämi chon ü ngeniei. Ifa usun, äm aipwe atowu koluk seni lon ei achau fän itemi?”

¹¹Mürin, Moses a aitiela wokun o wichi ewe achau fän ruu. Iwe, ewe koluk a pumongowu, pwe ekewe aramas me nöür kewe man ra ün.

¹²Nge ewe Samol mi Lapalap a üreni Moses me Aaron, “Pokiten ousap lüküei, ousap pwal apiniöchüei me fän mesen ekewe aramasen Israel, iei mine ousap emwenirelong lon ewe fanü üpwe ngeniir.”

¹³Ei a fis me arun ewe kolukun Meripa , ewe ia ekewe aramasen Israel ra anini ngeni ewe Samol mi Lapalap ie, nge i a pwärätä me leir pwe a pin.

¹⁴Iwe, Moses a tinala chon künö seni lon Kates ren ewe kingen Etom pwe repwe üreni, “Iei alon pwiüm kewe chon Israel: En ka püsin silei usun ewe riaföü a torikem.

¹⁵Ka silei usun än äm kewe lewo feila Isip. Iwe, äm aia nonom lon Isip fansoun langatam. Nge ekewe chon Isip ra ariaföüükem me äm kewe lewo.

¹⁶Iwe, lupwen aia siö ngeni ewe Samol mi Lapalap, a rong äm siö o tinato eman chon läng pwe epwe emwenikeemiwu seni Isip. Iwe, iei aia nom lon Kates, eu telinimw mi nom ünükün fanüom.

¹⁷Kose mochen kopwe mwüt ngenikem pwe aipwe pwerelong lon fanüom. Äm aisap pwerelong lon om tanipin wiich ika tanipin wain, aisap pwal ün koluk seni ekewe chönüttu. Äm aipwe chök fetal won än ewe king alelap, nge aisap kul ngeni pelifichin ika pelimöngün tori aipwe pwerewu seni fanüom.”

¹⁸Nge ewe kingen Etom a pälüeni, “Ousap fokun pwerelong lon fanüei, pun are oupwe pwerelong, äm aipwe maun ngenikemi.”

¹⁹Iwe, ekewe aramasen Israel ra üreni, “Äm aipwe chök fetal won ewe alelap. Nge are äm me nöüm man aipwe ün seni om koluk, aipwe möni. Kopwe chök mwüt ngenikem pwe aipwe pwerelong, esap pwal wor och lükün.”