Numero 20:8-19

⁸“Kuwaa nu sikan is tuked nu ne tiǥuma niw zuen te suled nu he si Aaron is langun he menge etew. Ne zutun te edtengteng dan, ne keǥiyi nu is batu he mebeǥey te wahig, ne edtudà is wahig su wey niw meveǥayi te wahig is menge etew su wey zan mekeinum duma te menge uyaǥen dan.”

⁹Umbe, migkuwa ni Moises sikan is tuked puun te etuvangan te Nengazen, diyà te Kavan te Kebpekid-uyun kandan he ziyà te seled te tulda sumalà te insuǥù te Nengazen kandin.

¹⁰Ne hein nekuwa zin en, midtiǥum dan ki Aaron is langun he menge etew ziyà te egkesineruwan te vatu, ne migkeǥiyan sikandan ni Moises te, “Pemineg kew is menge mesinukulen, kinahanglan be he ebeǥayan dey sikiyu te wahig puun kayi te vatu?”

¹¹Ne imbayew ni Moises sikan is tuked din ne midlagkut din te kezezuwa sikan is batu, ne midlepew zutun is wahig, ne mid-inum is menge etew wey is menge uyaǥen dan.

¹²Piru migkaǥi is Nengazen diyà te ki Moises wey ki Aaron te, “Tenged te wazè kew medsarig kedì pinaaǥi te kebpaahà te kegkewaǥas ku ziyà te etuvangan te menge Israilihanen, kenè kew iyan ebpekepengulu te keduma kayi te menge etew pehendiyà te tanà he ibeǥey ku kandan.”

¹³Haazà he lugar migngezanan te serebseb te Meriba su mibpekidlalis is menge Israilihanen te Nengazen kayi he lugar, wey kayi zaan ipaahà te Nengazen kandan is kegkewaǥas din.

¹⁴Hein diyè pa te Kadesh is menge Israilihanen, impehendiyà ni Moises is menge menunudtulè din te hadì diyà te Edom. Iyan heini impetudtul ni Moises kandan, “Heini he lalag ebpuun diyà te menge kezuzumahi nu he menge etew te Israel: Netuenan nu is langun he kemeresayan he neeǥiyan dey.

¹⁵Is menge kepuun dey midhendiyà te Ehipto, ne neuǥet is ked-ubpè dey ziyà. Impaantus key wey is menge kepuun dey te menge Ehiptohanen,

¹⁶piru mibuyù key te tavang diyà te Nengazen ne mibpemineg key zin, ne midsuǥù sikandin te velinsuǥuen he mibpeǥawas kenami ziyà te Ehipto. “Guntaan kayi key te Kadesh he inged he uvey te tanè nu.

¹⁷Emun egkehimu ne ituǥut nu kenami is kebayà diyà te tanè nu. Kenè key ebayà diyà te menge bevesukè nu etawa pemuleey nu te paras wey kenè key ed-inum diyà te teheb. Diyè key zà ed-ikul te zekelà he beyeey ne kenè key en ebpenuweysuwey taman te ebpekeǥawas key puun te tanè nu.”

¹⁸Piru iyan heini tavak te hadì te Edom: “Kenà egkehimu ke ebayè kew kayi te kenami. Emun ebayè kew, edsurungen dey sikiyu ne ebpenhimetayan.”

¹⁹Midtavak is menge Israilihanen te, “Diyè key zà ed-ikul te dekelà he zalan; ne emun ebpekeinum key wey is menge uyaǥen dey te wahig niw, ne ebeyazan dey heini. Iyan dà tuyù dey is kebayà diyà te tanè niw, ne wazè en duma.”