Numperis 19:13-22

¹³Iwe, iö a atapa inisin eman somä, nge esap alimelima, a alimengaua än ewe Samol mi Lapalap we imwenfel seni mangaku. Ewe aramas epwe käriwu seni ekewe chon Israel. Pokiten ewe kolukun limelim esap utututä won, ätewe epwe nom lon tettelin chon limengau, nge an limengau epwe chök nonom won.

¹⁴Iwe, iei ewe allük lupwen eman aramas a mäla lon eu imw mangaku: Iteiten eman me eman mi tolong lon ewe imw mangaku, pwal iteiten eman me eman mi nom lon epwe nom lon tettelin chon limengau lon ükükün fisu rän.

¹⁵Nge iteiten sepi esap wor pwölüpwölün mi riritä won epwe pwal limengau.

¹⁶Iwe, iö a atapa eman somä mi mäla ren ketilas, ika eman somä mi chök püsin mäla me lemäl, ika chün eman somä, ika eu peias, epwe nom lon tettelin chon limengau lon ükükün fisu rän.

¹⁷Iwe, repwe angei ekis falangen ewe kow mi kekila fän iten asoren tipis o nofiti ngeni koluk mi limöch lon eu sepi fän iten ewe mi limengau.

¹⁸Mürin, eman aramas mi limöch epwe angei ülün ewe irä isop, epwe atukalong lon ewe koluk o äsupu won ewe imw mangaku, won pisekin lon meinisin pwal won ekewe aramas mi nom lon. Epwe pwal äsupu won ätewe mi atapa chün eman somä ika atapa eman mi ninnila, ika atapa eman somä mi püsin mäla, ika atapa eu peias.

¹⁹Iwe, ewe aramas mi limöch epwe äsupu ewe koluk won ätewe mi nom lon tettelin chon limengau lon aülüngatin me afisuen rän. Iei usun epwe alimelima ätewe mi limengau lon afisuen rän. Iwe, ätewe mi limengau epwe sopuni üfan o tütü, nge lekuniol epwe limöch.

²⁰Iwe, are eman aramas a nom lon tettelin chon limengau, nge esap kütta limelim, ätewe epwe käriwu seni ewe mwichen aramas, pun i a alimengaua än ewe Samol mi Lapalap leni mi pin. Pokiten ewe kolukun limelim esap utututä won, a limengau.

²¹Ei epwe eu allük fän itemi fansoun meinisin. Iwe, ätewe mi äsupu ewe kolukun limelim epwe sopuni üfan. Nge ätewe mi atapa ewe kolukun limelim epwe nom lon tettelin chon limengau tori lekuniol.

²²Iwe, mettoch meinisin ewe aramas mi limengau a atapa epwe limengau, nge eman mi atapa ekei mettoch epwe pwal limengau tori lekuniol.”