Ni Gi 19:13-22

¹³A bakovi i padoi a podana viri, i uka ma i rata ia ge matapado, bara i muto mavonga. A vuhuna i uka ma i bolea ra naru ni rata a viri ge matapado, i uka ma ni voro tamali langa a naru vona. Ra naro iea i ratea a kape nau, i muto na matagu, lakea ra bakovi iea i uka ma ge made turane huriki a tara nau.

¹⁴“A bakovi o a ngatavine i mate pololilo na kape, e huriki a bakovi ri made pololilo na kape iea, e huriki ri dili na kape, bara ri muto na matagu na parava i polorua.

¹⁵A maka ulo, a tavila, a maka maki ri uka a matane ria ri tabuli pololilo na kape, ria ranga ri muto.

¹⁶A bakovi i laho polovavo na tanga i padoi a podana bakovi ni rabalaki, o i padoi a podana bakovi i mate tavula kunana, o i padoi a tuhana bakovi, o i paha a lovo, ra bakovi iea bara i muto na matagu na parava i polorua.

¹⁷“A naro ni rata vuroki a hini muto na bakovi o na ngatavine i maea. Mu ru na ulo ranga havulana bulmakau ni gutu-vuro ne vona a nihabi ni vakamatapado. Mu kirua na ulo a naru.

¹⁸A bakovi i matapado na matagu ge bolea a rahana kai a hisop ge lutua na naru, ge voro tamali lakea na kape i mate vona a bakovi ne huriki a bakovi a ngatavine, na maka maki lobo ri tabuli pololilo na kape. A bakovi i padoi a tuhana bakovi i mavuru pali, o i padoi a podana viri i mate pali, o i padoi a podana bakovi ni rabalaki, o i paha a lovo. Ra bakovi i matapado na matagu, ge voro tamali a naru vona a bakovi i muto na matagu.

¹⁹Na toluna parava, a poloruana parava, ra bakovi i matapado ge voro tamali langa na bakovi i muto a naru. Ra bakovi i ngaru ni matapado, ge loi pasi a maka varakia vona, ge hilolo. Na tahuna a haro i rolo na poloruana parava, bara i matapado.

²⁰“Pali bara bakovi tara i muto, i uka ma i ramai a naro ni vakamatapado, ra bakovi iea bara i muto mavonga na matagu. A vuhuna i uka ma ni guru langa a naru na ni ratana a bakovi ge matapado. Ra bakovi iea i ratea a kape nau i muto, lakea ni gi tono tala e huriki a tara nau.

²¹E huriki a Israel ri gi ramai vakaroroa a vinara iea. A bakovi i guru langa a naru na bakovi tara ge rata ia ge matapado, ge loi pasi a maka varakia vona. A bakovi tara i padoia a naru ne vona ni rata a bakovi ge matapado, ra bakovi iea i muto na matagu i harena na haro i rolo.

²²A bakovi i muto i padoi a maki ranga, ra maki i padoi ri muto na matagu. E rei a bakovi i padoi a maki nga, ia tara i muto na matagu, bara i muto mavonga i harena na haro i rolo.”