Numperis 13:9-25

⁹Palti nöün Rafu mwän seni ewe ainangen Peniamin,

¹⁰Katiel nöün Soti mwän seni ewe ainangen Sepulon,

¹¹Kati nöün Susi mwän seni ewe ainangen Josef, wesewesen seni ewe ainangen Manasa,

¹²Amiel nöün Kemali mwän seni ewe ainangen Tan,

¹³Setur nöün Mikael mwän seni ewe ainangen Aser,

¹⁴Napi nöün Wofsi mwän seni ewe ainangen Naftali,

¹⁵Keuel nöün Maki mwän seni ewe ainangen Kat.

¹⁶Ikkei ir ekewe mwän Moses a tinirela pwe repwe operi ewe fanü. Nge Hosea nöün Nun we mwän Moses a aita ngeni Josua.

¹⁷Iwe, lupwen Moses a tinirela, a üreniir, “Oupwe feitä lon ewe fanü Nekep o feila ngeni ewe fanü mi chukuchukutä,

¹⁸pwe oupwe ouwasacha lapalapen ewe fanü, are ekewe aramas mi nonom won ra pöchökül ika apwangapwang, are ra chokükün ika chomong.

¹⁹Oupwe ouwasacha are ewe fanü a mürina ika ngau, are ar kewe telinimw ra imweimw lon telinimw resap tit ika telinimw mi pöchökül tittir,

²⁰are ewe fanü a fanüeräs ika esap, are a mär irä won ika esap. Oupwe tipepwora o uwato ekoch föün irän ewe fanü.” Iwe, ei fansoun a otun nupun mwen uän irän wain.

²¹Iwe, ekewe chon op ra feitä o operi ewe fanü seni ewe fanüapön Sin tori Rehop arap ngeni ewe al a ale ngeni Hamat.

²²Ra feitä akomw lon ewe fanü Nekep o tori Hepron ia Ahiman, Sesai me Talmai, ekewe mwirimwirin Anak, ra imweim ie. Nge ewe telinimw Hepron a kaütä fisu ier mwen ewe telinimw Soan lon Isip a kaütä.

²³Iwe, ra tori ewe lemolun Eskol, ewe ia ra kini me ie eumw umwun föün wain mi umwumong. Iwe, ruoman leir ra ämwära won efoch ämwär. Ra pwal uwato ekoch föün apel me föün fiik.

²⁴Iwe, ra aita ngeni ewe leni lemolun Eskol pokiten ewe umwun föün wain ekewe re Israel ra kini me ikenan.

²⁵Iwe, amüchülan faik rän, ekewe chon op ra liwinto seni ar operi ewe fanü.