Israel Hanigo Namba 13:9-25

⁹Palti, te Rafugo ogwa dao, aga te Benjamin hani bidi dao.

¹⁰Gadiel, te Sodigo ogwa dao, aga te Sebulun hani bidi dao.

¹¹Gadi, te Susigo ogwa dao, aga te Manase hani bidi dao.

¹²Amiel, te Gemaligo ogwa dao, aga te Dan hani bidi dao.

¹³Setur, te Maikelgo ogwa dao. Aga te Aser hani bidi dao.

¹⁴Nabi, te Vopsigo ogwa dao. Aga te Naptali hani bidi dao.

¹⁵Me Guel, te Makigo ogwa dao, aga te Gat hani bidi dao.

¹⁶Mosesgo te hani tobolu bidi dabe te Kenan bulu tǫ sese sa sugi pomainu tagala palali. Tama agai te Hosia te Nungo ogwago nogi hasegelali. Tama agai aga te Josua poali.

¹⁷Te Moses agai augwali tagala palainu, agai augwalibolo e tiwai po walali, “Dage pelama, te distrik Negev ela pelama, ugwadu bulu du dabeba piąo.

¹⁸Dagego bugagia suiąo, tama dagego koneiąo, te mena tiwai bulu yaliwe koneagameo. Tama dagego suiąo, mena tama we bidi te bulude bidibawe weyu suiąo, te augwali bomai hani yaliwe, ma meni yaliwe, suiawe?

¹⁹Tama me dagego bugagia mu suiąo, te bulu tǫ te dwai yaliwe, ma wiegi yai yaliwe suiąo. Te we bidi te bomai obo tomode bidibowe, ma olo obo meni yai hanude bidibowe, suao.

²⁰Tama bugagia suiąo, te tǫ ili elalubowe, ma meniwe? Me te dulu elalubowe, ma meniwe, suao. Tama dagego te bulude ni du wai dabe me selama sesiąo. Dage olo ma aselamu dao.” Mosesgo augwalibolo te po te ni wain du tau ebo gagalobo sogo te po augwalibolo mani.

²¹Tama te bidi dabe augwali te bulu tǫ dabe tigidali mu sa susa biligi pali. Te giliga asobo badu wę meni sane bulu badu gagalama, te saut badu usu nigi pali, tama te hanu Rehopba saboligi pali, te hanu Hamatba pabo sunumi pąbadu te not badu.

²²Hasia augwali te distrik Negev sabolama, tama augwali te hanu Hebronba pali. Te Ahiman de Sesai, me Talmai hani, te Hebronde bidali. Augwali te hani sela te augwaligo wąį te Anak hani dao. Te hanu Hebron te gasa bidi hanigo bolo hasia nigai, tama te kibu be a naga olama si nosali te Isip hanigo te hanu Soan nigai dao.

²³Tialima, te Israel tobolu bidi dabe augwali te Eskol odogo yai buluba sabolama, tama augwaligo te ni wain du hauwa yai ni nologo deli togali. Te ni nologo sęgę mu yali, tama bidi deligo tolabo usu meni yani. Tama tibaso, bidi sigo ni palama dedage elama tolali. Te me augwaligo te ni fik du dabe me, pomigranet du dabe me, tama sali.

²⁴Nosali Israel dabego te odogo yai bulu nogi Eskol poali. Magi baso meni, te genuai bidi dabe augwaligo te pesagede ni wain du tede sai dao weyu.

²⁵Augwaligo te bulu bidi sese si sogo sa susa bilama, nosali augwali te Moses, me Aron, me te Israel we bidi dabe pageba ma aselayali. Augwali sese te bulu Kades te nai meni yai bulu Parande bidibadi. Tama te tobolu bidi dabego augwaligo suali nai po pusigi pali, tama augwaligo te sesali nai te we bidibolo waselali.