Numperis 13:20-28

²⁰are ewe fanü a fanüeräs ika esap, are a mär irä won ika esap. Oupwe tipepwora o uwato ekoch föün irän ewe fanü.” Iwe, ei fansoun a otun nupun mwen uän irän wain.

²¹Iwe, ekewe chon op ra feitä o operi ewe fanü seni ewe fanüapön Sin tori Rehop arap ngeni ewe al a ale ngeni Hamat.

²²Ra feitä akomw lon ewe fanü Nekep o tori Hepron ia Ahiman, Sesai me Talmai, ekewe mwirimwirin Anak, ra imweim ie. Nge ewe telinimw Hepron a kaütä fisu ier mwen ewe telinimw Soan lon Isip a kaütä.

²³Iwe, ra tori ewe lemolun Eskol, ewe ia ra kini me ie eumw umwun föün wain mi umwumong. Iwe, ruoman leir ra ämwära won efoch ämwär. Ra pwal uwato ekoch föün apel me föün fiik.

²⁴Iwe, ra aita ngeni ewe leni lemolun Eskol pokiten ewe umwun föün wain ekewe re Israel ra kini me ikenan.

²⁵Iwe, amüchülan faik rän, ekewe chon op ra liwinto seni ar operi ewe fanü.

²⁶Iwe, ra feito ren Moses me Aaron me ekewe aramasen Israel meinisin mi nom lon Kates lon ewe fanüapön Paran. Iwe, ra apworausa ngeniir pworauser, ra pwal apii ngeniir uän irän ewe fanü.

²⁷Iwe, ra üreni Moses, “Äm aia tori ewe fanü ia ka tinikeemila ie. Ewe fanü eu fanü mi pwülüöch o fanüeräs, nge iei uan.

²⁸Nge ekewe aramas mi nonom lon ewe fanü ra pöchökül, pwal ekewe telinimw ra watte o pöchökül tittir. Iwe, ikenan aia pwal mwo nge küna ekewe mwirimwirin Anak mi mwänemong.