Niqiqoosa 8:24-33

²⁴Simoonafa mi-ufána iriséenoo tautúmaseenoo Peetooroosa Yoohaneesa minára qímanniminoo qinau. Óo ínneeqara amanée ínneeqara Ánutunara innaaru qífanoo sía mandáinaina óosana óosana ínnee qiandée sía qinísaa kambíqaani.

²⁵Peetooroosa Yoohaneesa Karaambáiqa áufakiana qímannimiseenoo qumurandée Yeerusareenni kafáa óoru fíqau. Óoru fídaqara Samaria máqusa káqikaa káqikaa maqusakiaqa Yísuna ámiqira fasaasa ufa qímannimímarée óoru fíqau.

²⁶Ánutuna qangiroo moó fannoo Firipina qímaminoo qinau. Anée dóo deedaqía. Aaná moó Yeerusaree máqusaindari aadána maqa maaqa aana fannoo qámbaana fídanoo Kaasa máqusai óoqu fímari aana. Anée óonuree mi-aannára randásee paqúria. Dóo uqéeraa qufanoo Firipifa miná iriséenoo deedaqí imaree dóo miqóo finau. Firipifa fífiufanoo mi-aanná paqúrimaseenoo Eetioopia máqusaindaraa fásiqa moó mi-aannái fímarufanoo paqúrinau. Mi-Eetioopia maqusánaa fasiqa dundúqarirafa márinau. Narí máqannaa anaasee rakísirana úriqararana munnimma aina rakísimarufa úriqararafa márinau. (Afaandama ítirafa márinau. Óoqai uqanna ánaasee rakísirausa úriqararausa akaqáusa nári aináina dadaaqímarusa nífaandama ítimariqau. Maqee sía mi-oosanáfa máridanoo. Óoqai uqanna márinau.)

²⁸Eetioopia máqannaa ánaasee rakísirana áuqu Kandaseenámmarifa márinau. Minásaa rakísimaru fasiqafa áfaandama ítirafa káaqa Ánutunara rímaru fasiqafa, mifá Yeerusaree máqusai narí qóosa rarisée marú karanaki Yeerusareenni óoru Ánutunara innaaru qímaseenoo óoru randéenoo ámaaqai qúmimarufano Firipifa paqúrinau.

²⁹Náaquqara andeeqara maraquna fannoo Firipina qímaminoo qinau. Anée miná kára fímariqoo óonuraina qáfaa. Eetioopia fásiqafa narí qóosa rarisée marú karanaki fídanoo óoqai tamummáqara fasiqa Eesaiaafa ákara rúmaqoona ásaana rinoo fímarinau.

³⁰Fímarufanoo Firipifa sandée óonureenoo miná kara ásaukunnai qumáreenoo mi-karána úqirafa áakaariqara sandánoo fídanoo iriséenoo irámmirinau. Óo maa-fasiqa, anée ásaana rímariannana óosana íridanee sía fee íridanee.

³¹Miqí qufanoo mi-Eetioopia fasiqáfa qinau. Moó fannoo kooroo ínaqau irini síammiridaqa. Miqí qímasee Firipinara qiní faqa uru óoqumariannee qímasoofanoo Firipifa miná qóosa rarisée marú karanaki káqi fímarufanoo akarámáfufanoo mi-fasiqána aaqá óoqumarinau.

³²Mi-Eetioopia fasiqáfa Eesaiaana maa-akarána ásaana rímarinau. Misá miná qumáre̱eqee sipsípa aandáu̱ra foora maréeqee áriranaki quqáqau. Misá sipsípa ánaaqi asausí aukímarufanoo sía dúdeepeenoo fáaqarimarifa máridanoo sipsípa ánaaqi qúmmaarumuara fooqáana ári márufanoo kái mumúqida marínau. Ánutuna sipsípa ánaaqi árimarufanoo mumúqida marínau. Sía moodáakari ufa qínoo fáaqarinau.

³³Misá firaaqóo asaurírana ámiqau. Miná andeeqára ufa síamma íriqau. Dóo mifá naríaraa kuqufinau. Miná ánaiqi miná áiku ásauku sía máriafa máridanoo sía minára ufa qifáranoo. Dóo narí kai márufa dóo kúqinau.