Apostolo 8:24-33

²⁴Ebu Simonaꞌa Petero zu Ioane umizeꞌenaꞌa, “Eḡe veize Zuhiꞌa Boro mazao kuranoꞌi, ḡaeꞌa rateꞌe ḡauḡaniꞌa eḡe mazao mene fureranoga veize!”

²⁵Ebu Petero zu Ioaneꞌe, Zuhiꞌa Boroꞌa zeḡe ubumao haḡaidoteꞌe haḡaiḡa rae fureniro, zu Zuhiꞌa Boro ḡoere haramiro. Eꞌe enogano ze iḡunadu Samaria ne ḡehaḡano Badiꞌa hari manoḡa harame ragaveꞌenaꞌa, Ierusalema neḡa bare itiro.

²⁶Zuhiꞌa Boro tuḡure vigaꞌa Firifo niro, raenaꞌa, “Iḡunadu Ierusalema neḡanonoꞌo Gaza neḡa ovoeꞌeteꞌe ibiḡa ḡuzu ovoroꞌi! Aꞌe haba bohaꞌa ibiḡa.”

²⁷Eꞌanoꞌo ani iḡunadu eꞌe ibiḡano ovoirotene, Etiopia vazeḡa boro ꞌahoganiꞌa eꞌe ibiḡano ovoe radiuꞌenogano hidiro. Aniꞌe Etiopia kuiniḡa, Kanedake rae huneꞌeteꞌe veize gaueꞌeteꞌe vazeḡa zu oma arinuteꞌe vazeḡa. Ani kuini moni niduꞌa ḡianinu. Ani Badiꞌa mazao kuranoga rae Ierusalema neḡa itadu,

²⁸bare ovoiroteꞌe zamaḡano. Aniꞌe hosiꞌa hutubeꞌeteꞌe kiuḡa zamaḡano ehoradu, peroveta vazeḡa, Isaia bukaḡa meꞌode radiunu.

²⁹Eꞌe zamaḡano Vine Zaḡoḡaniꞌa Firifo niro, raenaꞌa, “Kiu ꞌomo uꞌa onamadu, eꞌe teite ḡiriu onamoꞌi!”

³⁰Eꞌanoꞌo Firifoꞌa kiu uꞌa dure onamirotene, eꞌe vazeḡaniꞌa Isaia bukaḡa meꞌodeꞌenoga igiro. Eꞌanoꞌo Firifoꞌa ḡadinenaꞌa, “Ḡaꞌa meꞌodeꞌeteꞌe ḡoeꞌa hugaꞌe, edeḡa hehe?”

³¹Aneꞌa naenaeninaꞌa, “E hubehune mene idaḡa. Vaze ꞌahoganiꞌa ihohine ederiꞌuma.” ꞌOuge radu Firifo uminiro, ane teite kiu ranao ehoroga.

³²Aneꞌa buka zaḡoḡa meꞌodirotaꞌaꞌe ꞌahiꞌeꞌe: “Aniꞌe matihi radu tutune onameꞌeteꞌe mamoeḡa teige, zu mamoe iguḡa variꞌeꞌeteꞌe vazeḡa ꞌevorao sifu radiuꞌeteꞌe mamoeḡa ubuga teige, mene ḡoeriro.

³³Aniꞌe niḡa mae ovoeꞌenaꞌa, ḡuriro ḡoeꞌa hina kotaniro. Iniuꞌa ane mariga hariḡa rae fureniꞌuma? Rae furenogaꞌe mene idaḡa, mazaḡa ḡaboneḡa raha ꞌadaonoꞌo mae vaḡiniro ꞌahine.” (Isaia 53:7-8)