Loc Hechos 8:24-33

²⁴Jira Simón uai ote: —Ocuíraɨmamo cuedo jɨcari, nana o cuena daɨnáfuiaɨmona dafue cuemo níjiñeillena, —daɨde.

²⁵Afénomo Crístomo ñúefue nitádiaɨoɨ. Daje izói Juzíñamui uáillaɨdo úritiaɨoɨ. Ie meífodo, orécamɨe íaillɨnoɨ Juzíñamui jíllollɨuai aillo Samaria duera jófuiaɨmo llófuiaidiaillɨnoɨ. Ie mei Jerusalemo meine bitíaillɨnoɨ.

²⁶Afefue meífodo Juzíñamui abɨ ímɨe Felípena daɨízaɨbite: —Náidacaillano, fuirɨ batɨ́ Jerusalémona Gaza jófuemo jóidɨodo o jairi, —daɨde. Afeo zaféredɨzicɨdo jóidɨo.

²⁷Iemona Felipe náidacaillano áfeodo jaide. Dɨnomo uiécodo jaide Etiopía ímɨe éidajide. Afémɨe illaɨngo abɨ rɨ́imɨe. Afémɨe Etiopía illaɨngo Candace úcube úiñoraɨma. Afe llezica afémɨe óɨnima. Naui uícodo afémɨe Jerusalemo Juzíñamuimo cáɨmaduaide.

²⁸Afémɨe abɨdo ie énɨemo jáizaide. Ie caballo zonóicaiga ráɨiralloicɨmo ráɨicana Juzíñamui uai lloraɨma Isaías cuegáuai facádote.

²⁹Afe llezica Ñuera Joreño Felípena daɨde: —Jadílloicɨmo áɨnozillano afénomo nabairi, —daɨde.

³⁰Aɨnozillano, Felipe afémɨe Isaías cuegáuaillaɨ facáduana cacade. Iemona íemo jɨcánote: —¿O facádoga uaina meita onódɨo? —daɨde.

³¹Jira afémɨe uai ote: —Cuemo jino llóitɨmɨe iñédeza, ¿nɨɨe izói ónoitɨcue? —daɨde. Iemona Felípemo caifo ie dɨga dáanomo ráɨillena jɨcade.

³²Juzíñamui Cuegáuaimona afémɨe facádoga uai áfena daɨde: Oveja izói tɨ́izaillɨnomo uiga. Oveja jiza abɨ cuidódɨno uiécomo úriñedɨmɨe izói táɨide, afe izói afémɨe jaca nɨ́ɨfuedo úriñede.

³³Afémɨe ɨere jámairuigamɨe; jaɨ́cɨnaidɨfuena íemo rairuídiaɨoɨ. ¿Ie ñue illáfuedo mei bu úrille? Mei ie cáajano bie énɨemona nɨné táɨnocaide, —daɨde.