NARONAA 20:11-22

¹¹Akũ Musa ↄ sɛ̀ musu à gbɛ̀ɛ pìi lɛ̀ kũ a gòoo gɛ̃̀n pla. Í bò manamana, akũ ò mì kũ ń pↄ́kãdenↄ.

¹²Akũ Dikiri pì Musanɛ kũ Harunao: Zaakũ ádi ma náani kɛ a ma tↄ́ bò Isarailanↄnɛro, áni gɛ̃ kũńwo bùsu kũ matɛn kpáḿmanlo.

¹³Mɛriba ísɛ̃bokin gwe, gu kũ Isarailanↄ zuka kàn Dikirii, akũ à a ludakɛnaa mↄ̀ńnɛ.

¹⁴Musa gbɛ̃nↄ zĩ̀ ò bò Kadɛsi ò gɛ̀ɛ Ɛdↄmunↄ kína kĩnaa ò pì: Ókↄ̃nↄ n danɛ Isarailanↄ pì, ń wari kũ à ó lénↄ dↄ̃ pínki.

¹⁵Ó dizinↄ gɛ̀ɛ Misila, akũ o gìi kɛ̀ gwe. Misilanↄ wari dↄ̀wá kũ ó dizinↄ.

¹⁶O wiki lɛ̀ Dikiria, akũ à yã sì kũoo. À a Malaikaa zĩ̀ à bò kũoo Misila. Tera sà ó kú Kadɛsi, n bùsu lɛ́zɛkin.

¹⁷Ǹ ó gba zɛ́ ò gɛ̃tɛ n bùsuua. Óni gɛ̃tɛ buranↄ ke geepi búnↄaro, óni á lↄ̀gↄ'i miro. Ónigↄ̃ tɛ́ kína zɛ́da gũmmɛ. Óni litɛ ↄplai ke ↄzɛiro ari ò gɛ́ gɛ̃tɛo n bùsula.

¹⁸Akũ Ɛdↄmunↄ pìńnɛ: Áni le à gɛ̃tɛ ó bùsuuaro. Tó a gi, óni bo ò daálɛ kũ fɛ̃nɛdao.

¹⁹Isarailanↄ pìńnɛ: Óni gɛ̃tɛ zɛ́daamɛ. Tó ókↄ̃nↄ ke ó pↄ́kãdenↄ á í mì, óni a fĩna bo. Gɛ̃tɛnaan ótɛn wɛtɛ ado.

²⁰Ɛdↄmunↄ pì: Áni le à gɛ̃tɛro. Akũ ń zĩ̀karinↄ bↄ̀tɛ dasidasi ò sù dańlɛ kũ gbãnao.

²¹Zaakũ Ɛdↄmunↄ gì Isarailanↄnɛ ò gɛ̃tɛ ń bùsuua, akũ Isarailanↄ pã̀ńnɛ.

²²Isarailanↄ bò Kadɛsi ń pínki ò kà Oru kpia