NARONAA 13:24-33

²⁴Ò tↄ́ kpà gu pìinɛ Ɛsɛkↄlu guvutɛ, geepi línɛyↄ̃ kũ Isarailanↄ zↄ̃̀ gwe yãi.

²⁵Kũ ò bùsuu pìi yakɛ̀ gↄrↄ bupla, akũ ò ɛ̀ra ò sù.

²⁶Kũ ò sù Kadɛsi, Parani gbárannan, ò gɛ̀ɛ Musa kũ Harunao kũ Isarailanↄ kĩnaa pínki. Ò sù kũ baaruuo Isarailanↄnɛ ń pínki, akũ ò bùsuu pì línɛnↄ mↄ̀ńnɛ.

²⁷Ò yã pìi gbã̀ Musanɛ ò pì: O gɛ bùsu kũ n ó zĩn. Vĩ kũ zↄ́'io di gwe. A línɛnↄn dí.

²⁸Ama bùsupidenↄ gbãna. Ń wɛ̃tɛnↄn bĩni vĩ akũsↄ̃ ń wɛ̃tɛ pìnↄn zↄ̃kↄ̃ manamana. O Anaki burinↄ è gwe se.

²⁹Amalɛkinↄn kú Nɛgɛvi gbárannan. Itinↄ kũ Yebusinↄ kũ Amↄrinↄn kú bùsu gusĩsĩden, akũsↄ̃ Kanaanↄn kú ísira sarɛ kũ Yoda sarɛo.

³⁰Kalɛbu gbɛ̃nↄ lɛ́ yĩ̀tɛ Musa arɛ, akũ à pì: Ò gɛ́ ò bùsu pì sí, zaakũ óni fↄ̃ ò zĩ̀ bleḿma.

³¹Akũ gbɛ̃ kũ ò gɛ̀ɛ kãaonↄ pì: Óni fↄ̃ ò lɛ́tɛ gbɛ̃ pìnↄaro, zaakũ ń gbãna deóla.

³²Akũ ò bùsu kũ ò yakɛ̀ɛ pì gya bò Isarailanↄnɛ ò pì: Bùsu kũ o yakɛ̀ɛ pì bi bùsu kũ àdi a gbɛ̃nↄ mↄ́mↄmɛ. Gbɛ̃ kũ o ń é gwenↄ ń pínki bi gbɛ̃ gbã̀nanↄmɛ.

³³O gbɛ̃ gbã̀nagbãnanↄ è gwe Anaki burinↄ ũ. O ó zĩda è lán babanɛnↄ bà, lɛn ó de lɛ ń wɛ́n se.