NARONAA 11:9-23

⁹Tó plí kpà bùran gwãani, akũ manaa pìi dì kↄ́tɛ se.

¹⁰Musa mà òtɛn ↄ́ↄ dↄ ↄnlɛ kũ ↄnlɛo. Dikiri pↄ fɛ̃̀ manamana, akũ à kɛ̀ Musanɛ ĩni

¹¹à pìnɛ: Bↄ́yãin ntɛn wɛ́ tãmaii? Ma yã kpate mɛ́ à kɛ̀nnɛ vãni, akũ n gbɛ̃ pìnↄ gwana aso dìmɛnɛɛ?

¹²Makũ mɛ́ ma gbɛ̃ pìnↄ nↄ̀ↄ sì yá? Makũ mɛ́ ma ń í yá? Bↄ́yãi n pìmɛnɛ mà ń kú kpɛ lán nɛ́rande bà mà gɛ́ kũńwo bùsu kũ n la dà ń dizinↄnɛnn?

¹³Mákpan mani nↄ̀bↄ len mà kpá gbɛ̃ pìnↄa ń pínkii? Zaakũ òtɛn ↄ́ↄ dↄmɛnɛ òtɛn pi mà ń gba nↄ̀bↄↄ ò só.

¹⁴Mani fↄ̃ mà gbɛ̃ pìnↄ aso sɛ́ ń pínki madoro, zaakũ ń aso demala.

¹⁵Tó lɛn ĩni kɛmɛnɛ lɛ, ǹ tó ma n pↄnna le ǹ ma dɛ gↄ̃̀nↄ. Ǹsun tó mà wari pì kɛ doro.

¹⁶Akũ Dikiri pìnɛ: Ǹ Isaraila gbɛ̃ zↄ̃kↄ̃ kũ ń ń dↄ̃ don'arɛde ũnↄ kakara gbɛ̃nↄn baaakↄ̃ akuri ǹ su kũńwo dakarɛki kuta kia ògↄ̃ kú kũnwo gwe.

¹⁷Mani kipa mà yã onnɛ gwe mà a Nini kũ à kúmma kpado go mà dińnɛ, oni gbɛ̃nↄ gwana aso sɛ́ kũnwo de ǹsungↄ̃ ń sɛna ndo doro yãi.

¹⁸Ǹ o gbɛ̃nↄnɛ ò gbã̀ bo ń zĩdanɛ zia yãi, oni nↄ̀bↄ le ò só. Zaakũ ò ↄ́ↄ dↄ̀mɛnɛ ò pì, mán óni nↄ̀bↄ len la ò sóo? Ò pì ò sã̀na Misila. Abire yãin mani ń gba nↄ̀bↄ ò só.

¹⁹Oni só adi kɛ gↄrↄ donlo, gↄrↄ planlo, gↄrↄ sↄↄronlo, gↄrↄ kurinlo, gↄrↄ baronlo.

²⁰Oni só mↄ do gbãngbãn ari à bo ń yĩn a ni bo ń pↄn. Zaakũ makũ Dikiri má kú ń tɛ́, akũ ò pã kpàmai. Ò zuka dↄ̀ma ò pì, bↄ́yãi ò bò Misilai?

²¹Akũ Musa pì: Gↄ̃gbɛ̃nↄn kú kũmao tá gũn gbɛ̃nↄn dúbu wàa aakↄ̃, akũ n pì ĩni nↄ̀bↄ kpáḿma ò só ari mↄ do gbãngbãn yá?

²²Bee tó ò sãnↄ kũ zùnↄ dɛ̀dɛ dasidasi, ani mↄ́ḿma yá? Tó ò ísira kpↄ̀nↄ sɛ̀tɛ pínki, ani mↄ́ḿma yá?

²³Dikiri wèa à pì: Ma gbãna ni kánloo? Ĩni e tera, tó yã kũ ma ònnɛ ni kɛ ke ani kɛro.