NUMERA 11:9-23

⁹Hanuaboi ai hunu taruha ai e dihova negana ai, hari mana danu e dihova.

¹⁰Israel iduhudia iboudiai e taitai, ta ta ena kalaga iduarana ena kalaga iduarana ai; bena Mose ese edia taitai e kamonai. Iehova na e badu laloḡaraḡara; Mose danu e badu.

¹¹Bena Mose ese Iehova e hereva henia, eto, Dahaka dainai emu hesiai tauna ini vada o hadikagu toma? Edeheto oi na so lalo namo henigumu? Edeheto ina bese idoinai ireḡuna na lauegu maduna ai vada o halaoa?

¹²Ini taunimanima loḡora na lau natugu a? Lau ese na havaradia dainai oi na o tomu “lmamu ai a rosidia, rata e inuamu merona na heto, ela bona senedia na gwau henilaidia hamata tanona ai” a?

¹³Vamu na edeseni ai baina abia, ini taunimanima loḡora iubulaidia? Badina be idia na lau vairagu ai e taimu, e tomu “Vamu a henimai, baia ania”.

¹⁴Lau na sibogu ini taunimanima loḡora ireḡudia asiname heḡereḡere; maduna na metau herea, ihuana na asi goadagu.

¹⁵Emu ura egu ai bema unuheto, namona be boma bogagu hisi, ina harihari boma alagu mase, bena egu hemarai na basie hedinarai.

¹⁶Bena Iehova ese Mose e haḡania, eto, Israel tau-badadia hitu-ahui bavabidia hidi, oi dibamu tau-badadia korikori bona mai siahudia taudia; bena ba haboudia hebou kalagana vairanai, oi ida bae gini.

¹⁷Bena lau baina diho, baina hereva henimui unuseni ai; bona oi vada na henimu siahuna kahana baina abia lou, idia baina henidia; ini taunimanima ireḡudia madunana na oi ida ba huaia hebou, sibomu basio huaia.

¹⁸Taunimanima danu ba hamaorodia, baoto: Sibomui ba hahelaḡa ela bona kerukeru, bena vamu bavania; badina be Iehova o tai henia, oto “Daika ese amai vamu baine henimai? Aigupto ai bogamai e kunuva”. Taunabunai, Iehova ese vamu baine henimui, bavania.

¹⁹Dia dina tamona eiava rua bona eiava ima eiava gwauta eiava ruahui,

²⁰a hua ena dina iboudiai vamu bavania, ela bona ianina ai ba hesiku, bena ba dadaraia. Badina be Iehova, bogaragimui ai e nohomu Diravana, vada o dadaraia, ia vairanai o tai, oto “Dahaka dainai Aigupto a rakatania?”

²¹A Mose eto, Be, egu bese taudia iboudiai be domaga tauratoi aedia amo e rakamu: taudia; a oi na o tomu “Vamu baina henidia, bae ania, ela bona hua ta baine ore”.

²²Mamoe seridia bona nani seridia bae aladia ore, adia vamu, a? Eiava davara gwarumedia iboudiai bae abidia ore, idia bogadia ihakunudia a?

²³Iehova ese Mose e haere henia, eto, Iehova imana e tunamu a? Do ba itaia, lauegu hereva baine momokani eiava lasi.