Namba 24:10-14

¹⁰Go Balak têtac ŋandaŋ kêsa gêdêŋ Bileam, tec kêtuc lêma kêpi tau ma kêsôm gêdêŋ Bileam gebe “Aê kakalem aôm, gebe ôpuc boa ŋoc ŋacjo, mago aôm gôjam mec êsêac kêtu dim têlêac.

¹¹Ôêc su, ômu ôna nêm gamêŋ. Aê gabe jatoc aôm sa, mago Apômtau tau kêgamiŋ aôm waem.”

¹²Bileam gêjô eŋ awa gebe “Aê kasôm gêdêŋ nêm lau jaeŋŋa, taŋ kôsakiŋ dêdêŋ aê sêmêŋ naŋ, su gebe

¹³‘Silber to gold embe êsô Balaknê andu e mêŋêc, gebe êkêŋ êndêŋ aê, mago jatôm gebe jaŋgêli Apômtaunê biŋ atom. Aê oc jaŋgôm sec to ŋajam êtôm ŋoc ŋalêlôm êkac aêŋa jatôm atom amboac tonaŋgeŋ. Aê jasôm biŋ tageŋ, taŋ Apômtau kêsôm naŋgeŋ.’

¹⁴Ma galoc jamu jandêŋ ŋoc lau jana êtiam. Amboac tonaŋ ômôêŋ gebe jasôm biŋ, taŋ lau tônê sêŋgôm êndêŋ nêm lau êtu ŋamu naŋ, lasê êndêŋ aôm.”