Muqâqiŋ Dâŋ 22:11-29

¹¹Ŋic dâŋ wokemaŋnehec mueŋgopieŋ jaŋe ŋicwofuŋzi âgo ejareekac, â Wofuŋzi maŋ ɋaɋacne jueŋgopieŋ ŋic i jaŋere maname biaŋkeekac.

¹²Wofuŋ e ŋic mamana tarahec jaŋere dâŋ dopeckeekac, â burecŋic jaŋere dâŋ ine qame wahaekac.

¹³Ŋic ojoŋnezi dâŋ kecʒiŋuc muhuc ficko ŋeekac: “Laioŋzi hae ʒoŋao jukacte huhape nâcnuzackohec.”

¹⁴Boe sau ŋokac ere dâŋ i nombâŋ iŋucne, irec Wofuŋzi qaisoc‐jopaekac jaŋe ira hâcne hueŋgopieŋ.

¹⁵Naru motec jaŋe ɋieonecteaŋ fuŋkerâ wiac mutucne kosa eeŋgopieŋ, ehame bâbâtiŋko râec‐jopapene ine beherâ sâcne mac jueŋgopieŋ.

¹⁶Ŋoŋe ŋic moneŋ mafa sâkohec wiac jare tahac eniŋmuo me ŋaŋac mafa mâririhec eniŋte ŋic hapetac bâʒâic‐jopaniŋmuo ine ŋoŋe ŋaŋacne hapetac erâ juniŋmu.

¹⁷Go hazec râehaŋtec ŋic maŋɋârâŋhec jaŋe dâŋ gâcne mumbiŋ i qazu‐garepe mamana gie bazemec.

¹⁸Go iŋuc erâ ʒâhec manasuhuc ŋic gâcne jaza qazuc ehuc bubiaŋ manacmu.

¹⁹Go Wofuŋtao roweckecmurâ manasuhuc maŋɋârâŋ dâŋ ʒi hâcne gaza mutâc ekopac.

²⁰No gore erâ maŋɋârâŋ â mumutâc dâŋ 30 sâko qâreŋkepo.

²¹Erâ no dâŋ fâri qizecne qazu‐garepemu wâc, eme go irec mu wioc egarepie okacne bâtikie‐jarecmurâ mi eipiecmu.

²²Go ŋic hapetac e hapetac juekacte wiac‐ticne kâŋgâc mi jâoc rozemec, â ŋic moc e dâŋgieo wiʒec tâmiric domaha mu bawahac mi ecnezemec.

²³Wofuŋzi ŋic iŋucne jaŋe bafic‐jopahuc juju‐jeŋic jowac roeŋgopieŋ jaŋere juju jowac roocmu hâcne.

²⁴Go ŋic maŋʒochec jaŋe âgo mi ejarezemec.

²⁵Go jaŋere eebapazi bitiŋ egareha raʒitec kicguzacte jaŋerao mi qohotazemec.

²⁶Go ŋic mocte tofa bazucmurâ moc mi mupaŋkezemec.

²⁷Manakic, go mumupaŋgere fârine bâfuazo eipiehuc juhaŋtec wiac gâcne gowac rohuc fofo mâkige wâc mâmâc gowac roniŋmu.

²⁸Apa ŋosafâcge jaŋe mâreŋ ma râembiŋ i baʒic baefuc mi ezemec.

²⁹Ŋic moc e gie‐ticne basarickehuc baocmu e ŋic omane jaŋe mâcne, ŋicwofuŋ kiŋaŋ qaqajare irec sâc bâfuaocmu.