Muqâqiŋ Dâŋ 16:20-30

²⁰Ŋic moc e Anuture dâŋ âzâcne qazuc ekicne i mana rereŋ eocmuzi juhâc qâhâmoocmu, â moc e Wofuŋtao roweckehuc juocmu ere manapene ʒerine eocmu.

²¹Ŋic moc e maŋɋârâŋhec jume honerâ ŋic mamana sarichec mucneeŋgopieŋ, ehame dâŋ biaŋne mume aŋac‐jopaha mana ʒakieeŋgopieŋ.

²²Maŋɋârâŋzi ŋic mamanahec jaŋerao opâ ʒâŋe iŋucne eekac, â ŋic mutuc matacne jaŋe wiac qaqazu‐jare izi ine dameŋ sisipiric eekac.

²³Ŋic maŋɋârâŋ heczi dâŋ muzo murâ qanaŋ mana biric eekac, erâ ie dâŋ mume ŋic jaŋe aŋac‐jopaha mana ʒakieeŋgopieŋ.

²⁴Dâŋ biaŋnezi aŋac baŋacne eekac, erâ maŋnâŋecko aŋac bâfuahuc sahac‐nâŋec baafeckeekac.

²⁵Ŋic nâŋâc hata moc honerâ biaŋne mecne muhapene sifu hata izi raku hâmoc haeo fisikac.

²⁶Ŋic moc e nânâ nâ gapec eocte aŋac manahuc gie‐ticne ʒoɋachec baocmu.

²⁷Ŋic hehesicne jaŋe wiac hehesicne jaha eniŋte manasueŋgopieŋ, ehame dâŋjeŋiczi ʒoc iŋucne bâruŋkerâ ima gie baekac.

²⁸Ŋic sindaŋne jaŋe gupe micko âke dâŋ mueŋgopieŋ, ehuc ŋic âgofâc‐jeŋic jaŋerao fâfâuc bâfuaeŋgopieŋ.

²⁹Ŋic ʒâʒâicne jaŋe ŋic âgofâc‐jeŋic eatuc‐jopahuc sisipiricko râec‐jopaeŋgopieŋ.

³⁰Ŋic ʒâŋe bazuc enâreeŋgopieŋ jaŋere ruc banʒepeneŋ, â sumâŋ kieŋgopieŋ jaŋe ʒika qaniŋte maŋkeeŋgopieŋ.