Muqâqiŋ Dâŋ 14:24-34

²⁴Maŋɋârâŋhec juju izi ŋic mamana saric jaŋere eri hendiŋ ekac, â mutuczi ine ŋic mamana tâmiric jaŋere qâ ʒere ekac.

²⁵Ŋic moc e dâŋgieo dâŋ fâri qizecne mutaniŋkeocmuzi ŋic âgofâc‐ticne jaŋere juju ŋezickeocmu, â moc e ine burecdâŋ muocmuzi ŋic âgofâc‐ticne doc bacjopaocmu.

²⁶Ŋic moc e Wofuŋ araŋ bacneocmuzi erao rowecke sanaŋkeocmu, e iŋuc ehuc naru motecfâc‐ticne jaŋere qânâuŋ eocmu.

²⁷Wofuŋ araŋ babacne izi jujure opâ ʒâŋe ekac, moc e opâ i nâhuc hâmoc getâckeocmu.

²⁸Ŋicwofuŋ moc e kikefuŋfâc‐ticne guru sâko jucnepie ʒâŋe biŋe sâkohec eocmu, â kikefuŋfâc‐ticne jaŋe tâmiric ine ŋic omane tinac eocmu.

²⁹Ŋic moc e buuruchec juocmuzi mamana‐ticnere fuŋne bataniŋkeocmu, â moc e maŋʒoc‐ticnehec juocmuzi ine mutuc‐ticnere fuŋne bataniŋkeocmu.

³⁰Ŋic moc e wama ruaine juhuc sahac‐ticne gume jowac eocmu, â moc e maŋʒârâ‐ticnehec juocmuzi ine siec bibiricko wicsanaŋ fuaekac irec sâc eocmu.

³¹Ŋic moc e hapetac jaŋe bâʒâic‐jopahuc bâbâfua‐ticne wâwânâŋ ecneocmu, â moc e qarâ suriŋne jaŋe ehâmo‐jarehuc bâbâfua‐ticne araŋ bacneocmu.

³²Ŋic sindaŋne e eebapa‐ticnezi bawahaekac, â ŋic biaŋne e ine siocmâc juju‐ticnezi ŋeŋezic‐ticne eekac.

³³Maŋɋârâŋzi ŋic mamanahec jaŋere maŋko ŋeŋe juju eekac, â ŋic mutuc matacne jaŋere maŋko ine maŋɋârâŋ basaeŋgopeneŋ.

³⁴Tiŋe jujuzi ŋic ʒâŋe biŋe‐jeŋic bafahareekac, â eebapa sâqocnezi ine mimi busâqoc bâfua‐jareekac.