4Ŋonâŋ biaŋnezi ŋowe‐ticnere eridu tinac eekac, â ŋokac moc e ŋowe‐ticne mimi qaqa ecneocmuzi ine, umbeŋzi ŋic siec‐ticne nâekac irec sâc eocmu.
5Ŋic tiŋne jaŋe dâŋ biaŋne maŋkerâ jueŋgopieŋ, ŋic sindaŋne jaŋe ine eeatuc dâŋ sawa nâzâeŋgopieŋ.
6Ŋic sindaŋne jaŋere dâŋ izi ʒika iŋucne ŋic bâʒâic‐jopaekac, â ŋic tiŋne jaŋere dâŋzi ine ŋic ʒâic busâqoc faio juhapie bafic‐jopaekac.
7Ŋic sindaŋne jaŋe waha jopame omaeniŋmu, â ŋic tiŋne jaŋe ine mimiŋzi ɋâric jufehuc juniŋmu.
8Ŋoŋe mamanahec jupie ŋic jaŋe mumbiaŋ‐ŋopaniŋmu, â mutuc matacne juhapie ine mana wahac‐ŋopaniŋmu.
9Ŋic moc e maŋhuhuŋ juhuc nânâre hâmozacte gie bame biaŋkeocmu, â ŋic moc e ine ʒâŋe biŋe‐ticne sawa feocte manasuhuc ojoŋ juocmuzi nânâre hâmoocmu.
10Ŋic biaŋne jaŋe qowifâc‐jeŋic aijakic jaha hone maiŋ ejareniŋmu, â ŋic sindaŋne jaŋe ine hone qâoma ejareniŋmu.
11Ŋic moc e ʒoɋachec jaha hesarac gie baocmuzi nânâ sâcne bâfuaocmu, â ŋic moc e mutuc erâ qâoma juocmuzi ine roroc qaŋqaŋne juocmu.
12Ŋic sindaŋne jaŋe wiac hehesicne sawa eniŋte maŋkeeŋgopieŋ, â ŋic tiŋne jaŋe ine sanaŋkerâ domaniŋte manasueŋgopieŋ.