Muqâqiŋ Dâŋ 10:17-26

¹⁷Ŋic moc e mu bâtiŋ ecnepie mana maŋ erâ sâcne juocmu, â ŋic moc mu bâtiŋ ecnepie qikiŋnerâ hata qâsorieocmu.

¹⁸Ŋic moc e burecdâŋ muocmuzi ŋic âgofâc‐ticne qaisoc‐jopaocmu, â moc e gupe micko âkec eocmuzi ine ŋic mutuc matacne erâ juocmu.

¹⁹Sâqocne bâfuazo eeŋgopieŋ ŋic i jaŋe dâŋ bocjaha woseeŋgopieŋ, â ŋic maŋɋârâŋhec jaŋe ine dâŋ afecne sawa mueŋgopieŋ.

²⁰Ŋic biaŋnere dâŋ i siliwa ɋaɋacne irec sâc, â ŋic sindaŋnere maŋ mamanasu izi ine wiac fâri tâmiric.

²¹Ŋic biaŋnere dâŋzi ŋic ŋokac bocjaha bafic‐jopaekac, ŋic mutuc matacne jaŋe ine mutuc‐jeŋicte erâ hâmoeŋgopieŋ.

²²Wofuŋzi ŋic moc jambuŋkeme wiac fofo dunduŋ focneocmu, ehame ŋic e jahac ʒoɋac ehuc wiac moc ʒuhuckerâ bâbâfua i sâcne mi eocmu.

²³Ŋic mutucnezi wiac hehesicne ehuc aŋac manaekac, â ŋic mamanaheczi ine maŋɋârâŋte maname wiac biaŋne eekac.

²⁴Ŋic tiŋne e wiac irec me irec ecneocmu sâc bâfuaocmu, â ŋic sindaŋne e ine wiac irec me irec hâwickeocmu i hâcne fuacneocmu.

²⁵Ŋic sindaŋne jaŋe sisipiricte mâŋâŋ ɋicwânʒâŋneheczi ficne suec‐jopame siroweeŋgopieŋ, â ŋic sioc tâmiric jaŋe ine dameŋ sâc juhâc qâhâmoeŋgopieŋ.

²⁶Go ŋic ojoŋnezi gore gie moc baocte mi mucnezemec, e saŋeŋ me ʒamaŋ nâpene micsiec‐nâŋec ariweekac irec sâc, me ʒoczi hosâc‐nâpome ʒâŋe‐nâŋeczi hâhâtâweekac iŋucne.