Miti Mumu Ŋic 4:9-16

⁹Ŋic jajahec jahe babafic ehuc gie bapire fârine biaŋne fuaocmu, irec ŋic moc e bucticne mâcne, âgonehec mâmâc jupire sâckeocmu.

¹⁰Ehame jaheraonec moczi waha qame âgonezi sâcne bafahareocmu, â bucticne juhuc waha qame ine mo âgo‐ticnezi bafahareocmu, i aricne i!

¹¹Me mâmâteŋ dameŋko ŋic jajahec jahe mâmâc jaha fohuc heheâroŋ sâcne enicmu, â ŋic moc e buc fohuc ine fâfâreocmu.

¹²Me ŋic moc e buc juhame râsizi fisirâ bawahaocmu, ŋic jajaheczi babafic ehuc ine râsi sâcne jâpenicmu. Repa moc muc jahec â moczi bapene mi tâcneocmu.

¹³Ŋic waha qaqane moc e mâreŋ‐ticnere ŋicwofuŋ âkendâŋnezo murâ sâcne âkendâŋneniŋmu, â moc e kâpâcwâru ficko ŋekicnezi ŋicwofuŋ ŋeŋeo râepie ŋezo murâ sâcne ŋeocmu; izi juku ŋicqizec erâ mutuc ehuc uŋsawaŋ dâŋ qikiŋneme manacnepie wawahane eocmu, â ŋicmotec hapetaczi maŋɋârâŋhec jume ere ine manapie fefene eocmu.

¹⁵No ŋic sasawa mâreŋko jueŋgopieŋ jaŋere manasuhuc ʒiŋuc mana tarapo: Jaŋere ŋondeŋkonec hâcne ŋicmotec moczi ŋicwofuŋ âkehockeocmu.

¹⁶Ŋicwofuŋ moc e ŋic guru dindiŋ sâko guriŋ bajareocmu mecne, erâ ine wiac ebac ehuc juku hâmohame sifu ŋic moczi irec mocwâc manasuhuc ʒeri bari mi eocmu. Erâ i wiac racne jaha, mezi mâŋâŋ rorâ basanaŋkezo eipieeŋgopeneŋ irec sâc ekac.