15No iŋuc mana tararâ ʒiŋuc mupo: “Ŋic mutucne wiac fua‐jareocmu ijaha no fua‐nareme ʒiŋuc mupemu: No wemocte maŋɋârâŋhec jupo?” Iŋuc murâ mupo: “Maŋɋârâŋhec juju‐nane i wiac fâri tâmiric jaha.”
16Juku ŋic moczi moc maŋɋârâŋhec jumbiŋ jaŋe moc mi manasuc‐jopaocmu, â ŋic mutuc matacne jumbiŋ jaŋe wâc iŋuc jaha mi manasuc‐jopaocmu. Ŋic jaŋe juku nâŋâcne nikec‐jopa‐fâreocmu hâcne. Ŋic maŋɋârâŋhec mecne â ŋic mutuc matacne mecne nâŋâc mâmâc sasawa hâmo‐fârenaŋmu.
17No iŋuc mana tarahuc juwefuhape wiac biaŋnezi mâcne, ʒârâ hâriŋzi sawa fua‐narewecte juju‐nane qaisockepo. Wiac ebac epo i fâri tâmiric efârewec, nâŋâc mezi mâŋâŋ rorâ basanaŋkezo eipieeŋgopeneŋ irec sâc ewec hâcne.
18No gie sâko bahuc wiac sasawa hure hemârec efârepo i kecʒiŋuc muhuc manape fâri tâmiric ewec: Âkehocnuocmuzi raucke‐fâreocmu.
19E maŋɋârâŋhec juocmu me mutuc matacne juocmu i mozi manakac? Ehame no mâreŋko maŋɋârâŋhec juhuc gie barâ wiac bâfuapo i sifu ro rauc efâreocmu. Irec wiac bâfua‐fârepo i manape fâri tâmiric jaha ekac.
20No iŋuc murâ, gie ʒocne fârone bahuc jupo irec busâqoc manapo.
21Ʒiŋuc honeeŋgopeneŋ: Nâŋâc mamana â maŋɋârâŋ bâfuarâ mamana sarichec juhuc gie bapene fârine fuaekac i ŋic moczi giene mi bapa mâc juku ro rauc eekac. I wâc iŋuc jaha fâri tâmiric eekac â mi sâckeekac.
22Nâŋâc mâreŋko gie ʒocne fârone bahuc jueŋgopeneŋ, eme irec fârine wemo wiac moc fua‐nâreekac?
Miti Mumu Ŋic 2
Miti Mumu Ŋic 2:15-22