Menge Ininang 7:23-41

²³Mondà kepatan se omay din, limaoy si Moises te kedomaan din menge bowad-bowad i Israel.

²⁴Netelaan din se sebad tege Ehipto nemilang te sebad kedomaan din Judiyo. Penga niyan, dimapit si Moises te kedomaan din, aw dinaeg din se tege Ehipto, aw inimetayan din,

²⁵so eden din aw meg-aneng-aneng se menge Judiyo te sikandin se insogò te Timanem amon mengibing kandan lomowà lekat te Ehipto. Meneng wedà dan peg-aneng-aneng kenyan.

²⁶Keeldawan niyan, netelaan din se didowa Judiyo migbolaw. Migtelaman si Moises mig-osay kandan. Minikagi sikandin, ‘Elew, telekedowa kaw. Ikà niyo egbolaw.’

²⁷Meneng neopal heman ki Moises se otaw neopal te doma din. Inseging din si Moises aw minikagi, ‘Wedad migsogò kamno amon lomowan ka aw megtoladà kenami.

²⁸Imetayan a no lay heman iling te ininang no te tege Ehipto gebenini?’

²⁹Pegdineg i Moises kenyan, nelemitan aw kimadas doton te Midian, sebad lonsod mediyò. Mig-ogpà sikandin kidoen, aw nengognan, aw migbatà te dowa meama.

³⁰“Penga te kepatan se omay, kidoen si Moises te kebigtilan doton te ongan te bontod iningedanan Sinay. Migpekità se anghil diyà kandin doton te sagbet limegdeg.

³¹Pegkità i Moises kenyan, ontò nepela. Migpedapag sikandin amon tomengteng. Meneng dinineg din se kagi te Pengolo lekat te apoy,

³²‘Siaken se Timanem egseligan te kemonaan no gebii si Abraham, si Isaac, aw si Jacob.’ Pegdineg din kenyan, wedà ebey tengteng, so ontò sikandin nelemitan aw tinegangtang.

³³Minikagi se Pengolo, ‘Lowasi se sepatos no amon memasa ka kanak, so egpenimeneman se tanà seini.

³⁴Netegahan ko te ontò nelimahan se menge kedomaan no pinemallì ko doton te Ehipto. Dinineg ko se pegtawal-tawal dan diyà kanak. Megpelowà a den kandan. Na, sikona den se isogò ko doton te Ehipto.’

³⁵“Si Moises se tapay kinuluwan te kedomaan din bowad-bowad i Israel, so tapay dan minikagi, ‘Wedad migsogò kamno amon lomowan ka aw megtoladà kenami.’ Meneng sikandin se insogò te Timanem amon lomowan aw mengibing kandan. Migtabang kandin se anghil migpekità diyà kandin doton te sagbet limegdeg.

³⁶Si Moises se mig-inang te kepelahan doton te Ehipto. Sikandin se nengibing kandan te pegkesayo dan lekat te Ehipto. Sikandin se nengibing kandan te peg-okit dan te dagat iningedanan Dagat Melalag, aw doton heman te kebigtilan te kepatan se omay.

³⁷Si Moises se mig-indan diyà te menge bowad-bowad i Israel te doen kwani sebad kedomaan dan inangen te Timanem telekeliwat te kagi din iling te pegsogò din ki Moises.

³⁸Si Moises se inindanan te anghil te kagi te Timanem kidoen te bontod iningedanan Sinay. Sikandin heman se migkeliwat te kagi te Timanem diyà te menge kemonaan tadon netipon kidoen te kebigtilan, aw ingkeliwat den heman iyan diyà kenitadon.

³⁹Meneng wedà tolò se kemonaan tadon kandin. Wedà dan penenalan kandin, so ibeg dan lomikò doton te Ehipto.

⁴⁰Pegtikedeg i Moises te bontod, nemoyò dan diyà ki Aaron, ‘Inangi kay te inotaw amon doen mengibing kenami, so wedà day ketegahi aw nemeno si Moises, sìyan nengibing kenitadon lekat te Ehipto.’

⁴¹Penga niyan, ininang dan se inotaw iling te bawa te nati te baka. Migdogsò dan aw migtawal-tawal dan kenyan. Induyun dan se ininang dan sìyan.