Menge Ininang 19:5-20

⁵Pegdineg dan kenyan, nemenal dan diyà te Pengolo si Jesus aw binonyagan dan.

⁶Pegpemaed i Pablo kandan, dimateng se Espiritu Santo diyà kandan, aw nekeikagi dan te medita kemolò kagi te doma otaw, aw kimeliwat dan heman te kagi te Timanem.

⁷Sempolò teg dowa se otaw nemenal.

⁸Dalem te telo se bolan, gayed egdoton si Pablo te simbahan te Judiyo. Wedà sikandin pegketalaw te pegtoladà din kandan tepad te peglowan te Timanem.

⁹Meneng doen menge otaw kimulu te pegpemenal. Medaet se inikagi dan tepad te kagi te Timanem intoladà din diyà te otaw netipon. Penga niyan, nesayo si Pablo lekat te simbahan, aw inibing din se menge otaw egpemenal doton te iskwilahan pigmeistrohan i Tirano. Migtoladà si Pablo kandan kidoen te kelikit te aldaw

¹⁰lamig te dowa se omay. Yan netegahan te kedita te otaw kidoen te Asya se kagi te Pengolo. Netegahan iyan te menge otaw Judiyo aw menge otaw kenà Judiyo.

¹¹Egtabang se Timanem ki Pablo, aw ininang din se kepelahan,

¹²so pengkey kelobaw aw penenaktun din ipeg-ated dan doton te otaw doen mesakit, amon kegolian se otaw sìyan doen mesakit, aw amon mekelowà se bosaw lekat te doma otaw.

¹³Doen menge Judiyo lomelegeb eg-ikagi te doen tolos dan megpelowà te bosaw lekat te otaw. Minikagi dan diyà te bosaw, “Lowà ka pineokit ki Jesus, sìyan intoladà i Pablo.”

¹⁴Se migtelaman kenyan, yan se pito batà te ontò pengolo te simbahan te Judiyo si Esceva.

¹⁵Meneng minikagi se bosaw diyà kandan, “Netegahan ko si Jesus aw si Pablo. Meneng sikiyo, eked ko toloi.”

¹⁶Penga niyan, pinengayaw dan te otaw dinetengan te bosaw, aw dinaeg se kedita dan. Yan kimadas dan kidoen nelingkasan te penenaktun aw nepelian dan.

¹⁷Nedengeg iyan doton te Efeso, aw netegahan iyan te kedita te Judiyo aw otaw kenà Judiyo. Nepela se kedita dan, aw induyun dan se ngadan te Pengolo si Jesus.

¹⁸Migselsel heman se menge otaw kaling nemenal. Wedà dan boloni se medaet ininang dan.

¹⁹Doen heman menge otaw biyasa egdelikmata nemegay te libro dan te delikmata, aw migsonog dan kenyan kinità te kedita te otaw. Binilang dan se keelagà te kedita te libro sinonog, dagpò niyan keliman melalan se kwarta dan.

²⁰Nedengeg se kagi te Pengolo intoladà, aw medita se otaw nemenal.