Hechos 19:5-20

⁵Kwian ulita Pablo keruchugu gerule ene Jesu giti gire ama ulita mo ñeangu chiske Chugagwalla Jesu kalla giti.

⁶Pablo ko gbu kwian e ulita chuga giti gdaite gdaite, Pablo gerudu Chube ole ama ulita giti gire Chube Oña chku kwian e ulita tale, kwian e ulita gerudu kwira nale me jwanba gire Chube ama ulita ta gbu Chube gerua kete kwian nage.

⁷Kwian e ulita onbre gdataboko giti gdaboke.

⁸Dai gdamai Pablo chegu una Efesoge diali Pablo kledu joge u kwian israelita mo litangwa Chube gerua jwanngwage una Efesoge, eni Pablo me kwachiu ni sidri Chube gerua Jesu giti trage kwian ole. Ama gerudu kwian ole kwian ulita mo ta gbadale geru Jesu giti gai ulia, ene Jesu giti kwian chege Chubenu.

⁹Kwian tanre geru e keruchugu, ama gweale mo chuga gbu mno me tadu geru Jesu giti gai ulia, kwian ulita gwa giti kwian e gerudu me no geru jagere Jesu gitidi, gire Pablo jo siere eni kwian ulita gerudu me no Jesu gerua dollalege. Boidu ene gire kwian Jesu gerua ganga Pabloge u na gau mo litangwa Pablo ole Jesu geruadi, kwian e ulita mo litu kwian kada Tirano ngwadi. Eni diali chui gdale Pablo kwian Chubenu tku tangle Jesu giti.

¹⁰Pablo chegu chura gdaboke ngmadi una ege kwian ta gbe Jesu geruadi, ene geru Jesu giti chageduda kwianske kle toi nga kweri Asiage ulita, kwian israelita kaire kwian me israelita ulita toinga nga Asiage geru Chugagwalla Jesu giti keruchugu.

¹¹Una Efesoge Chube Pablo gbu age tanre Chube kirallaske kwian gwa giti, Pablo lle daga ngwale no tanre dodadu Chube kiralla giti.

¹²Ñomedrega Pablo ko chugabadi ñomedrega nu oinbanga Pabloge kwian du kwian ogadi, ene kwian oga ñomedrega e chugedi gire oga joge chkeni noni, jingme joge siere kwian ogage kaire dolla joge siere kwian jwligebangage.

¹³Kwian israelita gweale mo gbu dolla kage siere kwian oga jwligebangage una gira jegwale, kwian israelita e tadu Jesu kiralla gai dolla kagagda siere Pablo kle age kare agwa kwian e me Jesu gau ulia, kwian israelita e gerudu dolla ole: —Pablo kle gerule Jesu giti, Jesu amaña kiralla giti cha gerule ba ole dolla, ¡joga siere kwiange!

¹⁴Kwian israelita gerunga Chube ole daba alin chugagwalla kweri kada Esceva ama kirolla gdaguke kledu chage age ene dolla kage siere kwiange.

¹⁵Bitaite Esceva kirolla ulita kledu dolla kage siere kwiange gire dolla gerudu ama ole: —Cha Jesu uñe trate, cha Pablo uñe trate kaire, ¿agwa ba ulita chema cha kagadale siere?

¹⁶Dolla kwian jwligebanga gbu gerule ene gire dolla kwian jwligebanga gbu mo kira chuge Esceva kirolla gdaguke ole, dolla kwian jwligebanga kira gbu tanre, kwian jwligebanga kirachku Esceva kirolla ulitadi. Dolla kwian jwligebanga gbu Esceva kirolla bate age daga ngwale ole, kwian jwligebanga ñometra ulita junnga Esceva kirolla gdagukedi, ama ulita lentigu tanre kwian jwligebanga kote. Esceva kirolla ulita kigedu taglale kwian jwligebanga ngeru, jo siere kwian jwligebanga kle toi ullage. Boidu ene ulita Esceva kirolla gdaguke ole.

¹⁷Kwian ulita kle toi una Efesoge kwian israelita kaire kwian me israelita, ama ulitage geru chku uñale boidu Esceva kirolla ole giti, gire kwian e ulita chegu kwachie tanre. E giti kwian tanre una emu Jesu gau dage ma no, sugedu ama ulitage ulia Jesu kira molen.

¹⁸Gire kwian ngle mo ta gbu Jesu gerua gai ulia, kwian e ulita gerudu kwian na tanre gwa giti ama agedu ulita me no ngeru giti, ama ulita gerudu ama mo ta blitu joge siere agedu me no ulita ngeruge.

¹⁹Kaire kwian ngle ta gbaboke me no ageba tanre kwian ole me no dolla kiralla giti ama Jesu gerua gau ulia, ama ulita chiu chada ngle dbe gugadale kwian gwa giti, chada e giti kwian kle geru jwen age me no kwian na ole che dolla Satanás kiralla giti, chada e mauña chada gugu kwian ulita kle mo litaba gwa giti, chada ulita jo gugaba ñanaske tanre igi cincuenta mil.

²⁰Kwian e ulita ta gbaboke me no, Chube Oña kwian e ulita ta gbu age ene Jesu gai kwian ngle gwa giti gire e giti kwian na ngle mo ta blitu Chugagwalla Jesu gerua gai ulia.