Menge Ininang 14:8-17

⁸Doton te Listra, doen sebad otaw kapig wedà palos pekeipanaw lekat te pegtebaw din.

⁹Nenenalan sikandin te intoladà i Pablo. Penga niyan, netegahan i Pablo te nemenal se otaw kapig te mekebatog se Timanem megpegolì kandin. Yan nenginoet si Pablo kandin

¹⁰aw timawal te dakel se kagi din, “Tindeg ka.” Pegketà neketindeg aw nekeipanaw.

¹¹Pegkità te menge doma otaw te ininang i Pablo, minikagi se tege Likaonya te kandan kagi wedà kelebeti i Pablo, aw migpetewalay dan, “Sikandan se timanem tadon migpekeotaw timenà dini kenitadon.”

¹²Eden dan aw si Bernabe se timanem dan si Jupiter aw si Pablo ekon se sogounun din si Mercurio, so sikandin se migtoladà.

¹³Doen dakel simbahan dan doton te lowà te Listra egtewal-tewalan dan ki Jupiter. Doen menge baka pineningaan dan te bolak inibing te pengolo te simbahan doton kandan amon idogsò dan ki Bernabe aw si Pablo.

¹⁴Meneng pegketaga-taga dan te ibeg te menge otaw kidoen, linisì dan se saol tandà te lidò te pedowan dan. Ayas dan dimoton te otaw netipon aw timawal dan, kagi dan,

¹⁵“Ikà niyo egdogsò kenami. Kenà kay timanem, meneng otaw kay heman iling kenyo. Dimini kay amon megtoladà kay kenyo te kagi te Timanem, amon lomengà kaw te pegsalig diyà te kenà benal timanem aw somalig kaw diyà te Timanem wedad temanan din, so sikandin se mig-inang te langit, aw tanà, aw dagat, aw kedita heman niyan.

¹⁶Kedengan, pinebeyaan te Timanem se eg-inangen niyo kenà Judiyo.

¹⁷Meneng gayed din impetaga-taga te doen Timanem, so egpemegay sikandin te odan, aw eg-entayen din se menge tinanem te kelikit te omay, amon megkedoen kànen niyo aw keluba te pedowan niyo.”