Menge Ininang 10:15-37

¹⁵Doen heman kagi todà dinineg din, “Ikà eg-ikagi te eked kepakay aw kànen, so minikagi se Timanem te mepakay iyan kànen.”

¹⁶Meketelo heman iyan keinang diyà kandin iling kenyan, aw penga niyan neengat se bekas doton te langit. Meneng wedad kinaen din.

¹⁷Mig-aneng-aneng si Pedro aw eden se kedegdagan te kinità din. Na, dalem niyan, mig-insà se menge otaw insogò i Cornelio aw kenan se balay i Simon. Telobo pa mig-aneng-aneng si Pedro, dimateng dan doton te lelebangan te balay inogpaan din. Kenà dan Judiyo.

¹⁸Timawal dan aw mig-insà aw sìyan se balay inogpaan i Simon, se doma ngadan din si Pedro.

¹⁹Dalem niyan te peg-aneng-aneng i Pedro te kinità din, minikagi se Espiritu Santo diyà kandin, “Na, tenà ka den, so doen telo otaw dimateng nengemahà kamno. Ikà egkulu te tomaking kandan, so insogò ko dan.”

²¹Penga niyan, timenà si Pedro aw mig-insà kandan, kagi din, “Siaken se otaw pinengemahà niyo. Eden lay se tod niyo kanak?”

²²Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”

²³Penga niyan, impeawop din dan aw impeidegà dan kidoen. Keeldawan niyan, timaking si Pedro kandan. Timaking heman kandin se menge doma otaw egpemenal lekat te Jopa.

²⁴Keeldawan heman niyan, dimateng dan doton te Sesarya. Migpeliman si Cornelio kandan, aw tapay din pigtipon se kedomaan din aw menge sigalak din.

²⁵Pegdateng i Pedro doton, simongon si Cornelio aw limongken diyà ki Pedro amon megsimba kandin.

²⁶Meneng minikagi si Pedro, “Tindeg ka. Siaken olò otaw. Kenà a Timanem. Ikà egsimba kanak.” Yan impetindeg i Pedro si Cornelio.

²⁷Nayan, migpebelaw-belaway dan aw minawop dan te balay. Medita se otaw netipon kidoen.

²⁸Minikagi si Pedro diyà kandan, “Netegahan niyo te eked kepakay aw megdoma se otaw Judiyo diyà te otaw kenà Judiyo. Eked heman kepakay aw gomemaw se otaw Judiyo diyà te balay te otaw kenà Judiyo. Siaken se Judiyo. Sikiyo se kenà. Meneng impetaga-taga a den te Timanem te eked a den peg-eked se megdoma te otaw kenà Judiyo.

²⁹Peg-angay dan kanak, timolò a aw dimini a. Na, nengà lay impeangay a no?”

³⁰Minikagi si Cornelio, “Netelowan pa, migtawal-tawal a diyà te Timanem te alas tris te meapon. Pegketà migpekità diyà kanak se anghil nenaol te mepotì,

³¹aw minikagi diyà kanak, ‘E Cornelio, dinineg te Timanem se pegtawal-tawal no kandin, aw netegahan din heman se keido no diyà te menge Judiyo nelimahan.

³²Na, sogò ka te otaw domoton te Jopa amon mangay ki Simon, se doma ngadan din si Pedro. Mig-ogpà sikandin dapag te dagat diyà te balay te kesangay din si Simon biyasa eglanit te kindal te ayam-ayam.’

³³Yan se doun te ayas ta impeangay. Mèpiya so dini ka den. Na, elew, netipon se kedita day amon menenalan kay te kagi te Pengolo ikeliwat no kenami.”

³⁴Nayan, migtebò si Pedro migtoladà kandan, kagi din, “Ontò ko netegahan te kenà olò Judiyo se otaw egkeidowan te Timanem.

³⁵Meneng keidowan din se kedita te otaw egtolò kandin aw eg-inang te mèpiya, pengkey otaw Judiyo aw pengkey otaw kenà Judiyo.

³⁶Netegahan niyo te insogò te Timanem si Jesus diyà kenami menge bowad-bowad i Israel amon megtoladà kenitadon te mèpiya indan tepad te kelinaw te pedowan ibegay din diyà te otaw memenal ki Jesu Cristo, so sikandin se Pengolo te kedita tadon.

³⁷Netegahan niyo se neinang doton te Judiya, so pegkepenga te pegtoladà i Juan tepad te pegbonyag, migtebò si Jesus tege Nasarit migtoladà doton te Galiliya.