Megwewali 6:4-12

⁴Minsan wazà pulus te kegkeetew te vatà, ne minsan midhendiyà sikandin te lugar te menge minatey he zutun kenè en sikandin egketenuzan,

⁵wey minsan kenè en sikandin ebpekaahà te kereyag te andew wey minsan wazè din en hanew mehitenged te untung, duen din mulà kelinew kenà duen te etew

⁶he wazè din kelipey zuen te meupiya he menge vutang he nezawat din. Uya, minsan utew pa melugayad is untung dutun he etew. Kenè be neked-iring dà he lugar is egkepeveyaan te langun he etew?

⁷Is etew edhaǥù su para zuen din egkekaan, piru kenà gihapun sikandin egkekuntintu.

⁸Hengkey is ibpekevintahà te etew he uluwanen te etew he tulebung? Hengkey is keupiyaanan he egkekuwa te pubri he etew emun metau sikandin te paaǥi te kebpengungubpaan?

⁹Wazà kayi pulus; henduen dà te edal-as ka te keramag. Umbe meupiya pa ke egkekuntintu ke en ke hengkey is naazen nu, ne kenè ke en medtulung mebpenganduy te zuma pa.

¹⁰Dengdengani zà is kegketueni te Megbevayà te langun, ne netuenan din en ke hengkey is egkehitavù kenitew. Umbe kenè tew egkevarew is imbanglis kenitew te Megbevayà, su mezesen pa sikandin kenà kenitew.

¹¹Emun edtulung ki ebpemarew ne ebpekeuman dà heini te nengekaǥi ta he wazè din pulus, ne kenà heini ebpekeveǥey kenita te keupiyaanan.

¹²Wazà nesayud ke hengkey is meupiya para kenita te etew seled kayi te mevavà wey wazè din pulus he ked-ubpè ta he iring dà te alung su edlavey zà. Wazà ebpekepenudtul kenita ke hengkey is egkeulaula kayi te kelibutan emun ebpatey ki en.