Megwewali 2:7-15

⁷Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.

⁸Ne midtiǥum a zaan te zekelà he selapì, bulawan, wey zuma he menge ketiǥeyunan he ebpuun te menge hadì wey ziyè te menge lugar he nesakup ku. Mezakel is memetau he menge perekanta ku, he menge maama wey menge vahi, ne zuen ku mahabet he menge esawa. Naangken ku is minsan hengkey he egkesuatan te etew!

⁹Iyan a pinekesepian te langun he etew he nekeubpà diyà te Jerusalem, ne wazà maawà is keuluwanen ku.

¹⁰Migkuwa ku is minsan hengkey he egkesuatan ku. Mibeelan ku is minsan hengkey he ebpekelipey kedì. Ne utew ku ingkelipey is langun he menge vaal ku, ne iyan heini vales te menge kedhaǥù ku.

¹¹Piru hein mibpurungan ku is-isipa is langun kayi te mibeelan ku, iyan neuma te isip ku is wazà pulus kayi te langun. Iring dà te edal-as a te keramag. Wazà iyan pulus te kedhaǥù kayi te kelibutan.

¹²Hengkey pa is egkehimu te ebpekesunud he menge hadì? Hengkey pa kekenà, iyan ded kes neveelan en duen te nehuna kandan. Migezaman ku te edhindeg is ketau wey ketutulebungi.

¹³“Meupiya is ketau kenè te ketutulebungi, su iring ded heini te kerayag su zeyzey heini te kerusireman.”

¹⁴Su is uluwanen he etew egketuenan din ke hendei sikandin ebpekepevayà, iyan is tulebung mulà ne kenà. Iyan, netuenan ku he ebpeked-iring is egkepegkusan dan te dezuwa su ebpatey zan pudu.

¹⁵Umbe, nekekaǥi a ziyà te ǥehinawa ku te, “Ke hengkey is egkeula-ula te tulebung iyan daan egkeulaula kedì. Umbe hengkey is egkekuwa ku he keupiyaanan kayi te ketau ku? Wazà iyan kayi pulus!