Megwewali 10:5-15

⁵Duen pa sevaha he kenà meupiya he neehè ku kayi te kelibutan, ne ed-ul-ulahan heini te menge pengulu:

⁶Is menge tulebung ebeǥayan dan te metikang he keǥehem, piru is menge sepian mulà ebeǥayan te mevavà he keǥehem.

⁷Neehè ku zaan he zuen menge uripen he ebpurung dà ebpemen-untud te kudà ne sikan is dungganen he menge etew ne ebpemenhipanew zà he iring te menge uripen.

⁸Emun ebangbang ka, kela ke meulug ka zuen. Emun edlesag ka ziyà te verengbeng te inged, kela ke keǥata ka te uled.

⁹Emun edlekat ka te vatu etawa egurey ka te kayu, kela ke mepelii ka,

¹⁰Emun mezumpel is wasey nu ne wazè nu heini kemengaa, ne kinahanglan he ebpendesendesen ka is egamit dutun. Meupiya ke uluwanen ka su pinaaǥi kayi ebpekezaag ka.

¹¹Emun duen nu ketau para kenà mekekaǥat is uled ne wazà dutun pulus emun nekaǥat ke zin en.

¹²Is menge ebpengeǥiyen te uluwanen he etew ne ebpekeveǥey kandin te keupiyaanan, piru is menge ebpengeǥiyen te tulebung he etew ne ebpekezezaat kandin.

¹³Kebpuun din kegkaǥi ne tinulebung en is menge ebpengeǥiyen din, ne emun ebpengkusen din en is menge lalag din ne mezaat en is ebpengeǥiyen din, ne henduen be sikandin te ebuneǥen en.

¹⁴Ne kenè en sikandin ed-engked he egkaǥi. Wazà netau te edtelinguma, ne wazà ebpekekaǥi ziyà te kenita ke hengkey is egkehitavù emun ebpatey ki en.

¹⁵Igkeveley te tulebung is terebahu zin, umbe egkeisip din he kenè en sikandin edhendiyà te inged su para kenà meketerebahu.