Mbouŋ to Yes Israela 77:5-20

⁵Pasa, matag iŋgal imuul ila pa ndaman katindi to ila wa. Ve naŋazuuv ŋgar to muuŋ Maaron ighamgham pa tamtoghon toni.

⁶Tovenen mboŋ to naol ne, nagham ŋgar tiina ila lolog, ve matag iŋgalŋgal naghaze:

⁷“Vena, pale Maaron ipul muri payei, ve ipul ghei nineep sami itaghoni taghoni gha ila? Irau lolo poia payei muul maau?

⁸Ŋgar to lolo ineep tuŋia ila to tamtoghon toni ve iuluul di, nene isob wa? Ve saveeŋ to ye imbua toman ghei, pale izi inim mbeb sorok itaghoni taghoni gha ila?

⁹Ma Maaron ate yabyab kat, le ighami lolo imaagh pa poia toni? Tauto lolo isamin ghei muul maau ne?”

¹⁰Nagham ŋgar tovene, tauto nasaav pa taug naghaze: “Lolog ipataŋan kat pasa, Maaron to ineep sala le sala kat ne, itoor ŋgar toni wa. Taghita tapiri inim inim le aazne, taghita muul maau.”

¹¹Yoova, you pale matag iŋgal imuul ila pa uraat tiom tintina, ve mbeb gharatooŋadi to muuŋ ughamgham di.

¹²Pale matag iŋgal uraat tiom ariaŋadi to naol ne, ve nagham ŋgar padi pooi.

¹³O Maaron, yom ughamgham ŋgar patabuaŋ moghon. Ŋgar tiom ve gabuam, nene ite kat. Maaron ite paam iza tiina inimale yom ne maau.

¹⁴Yom Maaron to ughamgham mbeb gharatooŋadi tintina. Upatooŋ tapirim ivot ighazooŋ ila ndug ndug matadi ve tighita katini wa.

¹⁵Yakop ve Yosep papaghu todi, yes tamtoghon tiom. Muuŋ, ila taum tapirim, yom upas yes Israela tivot pa pataŋani todi.

¹⁶O Maaron, sawa to ya tintina tighita ghom, matughezaaŋ tiina igham di. Ve te to ineep izila sila we, imatughez paam, ve imbeluuta izaza.

¹⁷Sawa tonenen, yaghur tae iyasosooŋ, ve uman tiina izi. Ve ndug ighani milia, ve lalaav kiliŋia.

¹⁸Yom ugham yaghur uti ililiit, ve lalaav kiliŋkiliŋia. Ndug milia, le ndug ighazooŋ. Ve yoŋgyoog itok taan katkatia.

¹⁹Ataam tiom imbut te ivool ila pa dige ite. Yom uvalag mazovan, le pida ila pa ŋas, ve pida ila pa waan, ve ulaagh ila bodbodaaŋ. Eemoghon tighita aghem muri maau.

²⁰Yom umuuŋ pa tamtoghon tiom unumale ŋginiiŋ to sipsip. Ve ughur Mose yesuru Aron tigham naghom, ve tighereb di tila.