Buk Song 77:5-20

⁵Mi tingting long guttaim bilong bipo. Tru tumas, mi tingim gen ol dispela yia i go pinis.

⁶Long nait mi wok long tingting i stap. Mi tingting planti na mi askim mi yet olsem,

⁷“Ating bai Bikpela i givim baksait long mi oltaim? Ating em i no moa laikim mi?

⁸Em i no laik sori long mi nau? Promis bilong en i pundaun pinis, a?

⁹Ating God i lusim tingting na i no laik marimari long mipela, a? Ating kros bilong en i pasim marimari?”

¹⁰Mi tingting olsem na mi tok, “God Antap Tru i no laik helpim mi nau. Olsem na mi bel hevi tru long dispela samting.”

¹¹God, bai mi tingting gen long ol bikpela wok bilong yu. Yes, bai mi tingting bek long ol kain kain bikpela samting bipo yu bin mekim.

¹²Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.

¹³God, olgeta pasin bilong yu i gutpela na stretpela olgeta. I no gat wanpela giaman god inap wantaim yu. Yu winim ol tru.

¹⁴God, yu wanpela tasol yu save wokim ol mirakel. Bipo yu bin soim bikpela strong bilong yu long olgeta lain manmeri.

¹⁵Long strong bilong yu yet yu kisim bek ol manmeri bilong yu, em ol lain tumbuna bilong Jekop na Josep i kamap bihain long tupela.

¹⁶God, bipo taim ol wara i lukim yu, ol i pret, na solwara daunbilo tru i guria nabaut.

¹⁷Bikpela ren tru i kam daun, na klaut i pairap strong moa, na lait bilong klaut i sut i go i kam long olgeta hap.

¹⁸Yu mekim klaut i pairap namel long raunwin. Lait bilong klaut i mekim olgeta hap bilong graun i lait, na graun yet i guria guria.

¹⁹Yu bin wokabaut namel long solwara. Rot bilong yu i stap namel long bikpela solwara. Tasol mipela i no save lukim mak bilong lek bilong yu.

²⁰Yu olsem wasman tru, na yu go pas, na ol manmeri i bihainim yu. Yu givim wok long Moses wantaim Aron, na tupela i bosim ol.