Mbouŋ to Yes Israela 49:10-16

¹⁰Iit taghita yes ŋgara timatmaat tinimale yes kankanooŋa to ledi ŋgar maau ne. Ve sawa to timaat, yes pale tipul mbeb todi tisob tizi tineep, ve mbeb tonowen tinim tamtoghon pida ledi.

¹¹Sawa to tineep matadi iyaryaar, yes izadi tintina. Pasa, ledi taan tiina ve mbeb katindi. Eemoghon sawa to timaat, naal to inim ledi inadi irau sawa isob.

¹²Tovenen ighaze tamtoghon eta iza tiina, ve le mbeb popoia katindi, nene poia. Eemoghon mbeb toni irau ipaghau mateeŋ pani ne maau. Pale ineep rismoghon, ve isob. Ye pale imaat ve ilale, inimale ŋgavuun ve ŋgai.

¹³Nene ataam to yes to tigham ŋgar to borouŋa, ve tipakur di pa mbeb todi. Aghita ŋgar to ivotvot padi ve yes to lolodi pa saveeŋ toman ŋgar todi, ghoro aghilaal.

¹⁴Yes tinimale sipsip to timbit di leso tirab di. Mateeŋ pale inim ŋginiiŋ padi, ve iweu di tizila ndug to mateeŋa, ve patudi imbuuz tonowe. Ve mboŋmaagh, ghoro ndiran deŋiadi pale tighita di, ve lolodi poia.

¹⁵Eemoghon you, ndug to mateeŋa le tapiri irau ikis ghou maau. Pasa, Maaron pale igham mulin ghou pa mateeŋ. Pale ipas ghou navot pa mateeŋ, ve igham ghou nala yeru nineep.

¹⁶Tovenen ighaze tamtoghon eta indou le mbaliiŋ, ve mbeb popoia katindi tivon ila ruum toni, ugham ŋgar naol pani malep.