Mboe 49:10-16

¹⁰Iti tuute: Tomtom ta boozomen kola timetmeete. Zin ŋgarŋan timetmeete raraate kembei wal kankaanaŋan ta len ŋgar somŋan i. Mi zin ta boozomen kola tizem koroŋ kizin ma imborene lup, mi naman men ma tila. Mi koroŋ kizin ko iwe wal pakan len.

¹¹Tana naala kizin, ta ko iwe len ruumu be timbotmbot pa ma alok. Indeeŋe ta matan iyaryaara na, zan bibip. Paso, len toono biibi mi koroŋ boozo. Mi so timeete na, naala ta iwe len murin be timbotmbot pa, mi iseeŋge iseeŋge ma ila.

¹²Tana tomtom ta so zaana biibi mi le koroŋ boozo, ina ambai. Mi irao iko pa meeteŋana na som. Kola imeete ma ila lene raraate kembei ta zin mbili.

¹³Tana wal ta so tipase pa zitun, na zin kankaanaŋan. Kere la pa mbulu ta iwedet pizin mi zin wal ta lelen pizin mi tito zin pa mbulu kizin, to kikilaala.

¹⁴Zin kembei sipsip ta timbit zin be tipun zin i. Pa meeteŋana ko iyaaru zin ma kaŋkaŋ ma tisula Andewa. Tana meeteŋana ko imborro zin, mi Andewa iwe len murin be timbotmbot pa mi tibuuzu.

¹⁵Mi nio na, Anutu ko ikamke yo. Ni ko itatke yo pa meeteŋana mburaana, mi ikam yo ma aŋla aŋbot raami.

¹⁶Tana sombe tomtom sa, ni indoundou le pat, mi ruumu kini bok pa koroŋ ndabokbokŋan boozo, na kam ŋgar boozo pini pepe.