Mbouŋ to Yes Israela 45:1-14

¹Lolog ipazaagh ghou pa saveeŋ popoia, tauto natoor mbouŋ tonene iŋarua kinik. Avog raurau pa toraaŋ mbouŋ, nanimale ŋgeu to nima poia pa bodeeŋ.

²O kinik, yom paghunam kat ulib pa tamtoghon tisob. Ve saveeŋ popoia to ivotvot ila avom, nene igham poian tamtoghon. Tovenen poia to Maaron pale ineep toman ghom irau sawa isob.

³Yom ariaŋam, ve uraua kat pa ghamuuŋ malmal. Izam tiina, ve upambood taum le paghunam kat. Ugham buza tiom, ve ugharaat ghom pa malmal.

⁴Yom izam tiina kat. Uza hos tiom, ve ula uparab toman koiamŋa le ulib padi. Uparab ariaŋa pa saveeŋ onoon, ŋgar to tatatan tauud, ve ŋgar deŋia. Nimam waan pale igham uraat tintina. Leso koiamŋa tighita ve timatughez.

⁵Kinik tiei, pane tiom ndinatu matadi kat. Tauto tiŋgal koiamŋa le tiyamaan katin di. Tovenen yes ndug ndug pale tinim ve titaptap tizi ila aghem samba.

⁶Maaron, pooz tiom irau isob ne maau. Pale uneep ila inam to ghamuuŋ pooz itaghoni taghoni gha ila. Ŋgar deŋia to ughamgham pa tamtoghon, nene inim ghilalooŋ pa pooz tiom.

⁷Pasa, yom lolom pa ŋgar deŋia, ve ughurghur koi pa ŋgar samia. Tovenen Maaron tiom ipakur ghom le ulib pa nditam pida, ve iliŋ ŋgoreeŋ izala poghom pa ighur ghom unum kinik. Tauto igham ghom lolom poia le poia kat.

⁸Nonogiiŋa tiom, tighur naunauŋ vuzi popoia naol ila. Ruum tiom, tipambooda pa mbeb popoia to tigharaat di pa mbeb ndoŋadi. Yes to rabuuŋ gita ve mbeb pida to aliŋadi popoia ne, tineep toman ghom ila ruum tiom lolo, ve mbouŋ todi igham ghom lolom poia kat.

⁹Ndiliva to ledi izadi tinim tineep toman ghom ila ruum tiom paam. Ve todi pida, nene kinik ndinatudi liva. Liva paghu to iyoon ila pa nimam waan ve ughaze uvaii, ye garawaat tidi. Ye itiktiik tau pa mbeb popoia le paghuna kat. Mbeb tonowen, tigharaat di pa gol poia kat to inim pa taan suruvu to Opir.

¹⁰Natug liva, yom ughaze uvai kinik. Tovenen ughur poian taliŋam, ve ulooŋ aliŋag tonene. Ugham ŋgar pa tamtoghon tiom ve siŋ tiom muul malep.

¹¹Yom paghunam kat. Pale usad kinik ate. Ye to inim tiina tiom. Tovenen yom irau ulooŋ aliŋa, ve uneep ila samba.

¹²Tamtoghon to ndug Tiro pale tigham lem mbeb popoia katindi. Yes to mbaliiŋ taudi kat, pale tigham lem mbeb popoia naol. Leso matam iŋgal di ve lolom poia padi.

¹³Garawaat tidi to ighaze ivai kinik, ineep ila ruum toni lolo. Ye paghuna le paghuna kat. Nonogiiŋa toni, tisaii pa teret to tigharaata pa gol.

¹⁴Ye indudi pa nonogiiŋa to bodeeŋadi popoia, ve tighami ila to kinik. Ndita ndiliva papaghu titaghoni ve yesŋa tila.