Pesalem 45:1-14

¹Biŋ êjam-êjam kêôliŋ kêpi aŋga aêŋoc ŋalêlôm tec gebe ênsêwa êsa. Amboac tonaŋ jansuŋ ŋoc wê êndêŋ kiŋ. Imbeloc kêtôm ŋac lêmagaôŋa keto kêlêpê.

²Aôm laŋômanô ŋajam kêlêlêc ŋamalac samob, taŋ sêŋgôŋ nom naŋ, nêŋ su. Gêdômôlic e têtac kêsa laŋgwageŋ. Amboac tonaŋ tec Anôtô gêjam mec aôm gedeŋ tôŋgeŋ.

³O ŋactêkwa, ôjandiŋ nêm siŋ êŋkaleŋ magim. Nêm laukasap e ŋawasi laŋgwageŋ.

⁴Ajôc, ŋac tau, ônac siŋ taumaŋ. Ôŋgôm êtu biŋŋanôŋa to ôpuc biŋgêdêŋ tôŋ. Ma lêmam anôŋa êwaka nêm ŋaclai kapôêŋ sa.

⁵Aômnêm sôb ŋamatagosu keseŋeŋ kiŋnê ŋacjo nêŋ nipkalop tôŋ ma tenteŋlatu samob sêu tauŋ jasêc amkaiŋ ŋalabu.

⁶Aômnêm lêpôŋ, taŋ Anôtô kêpuc tôŋ naŋ, êkô teŋgeŋ to teŋgeŋ. Aôm gôjam gôliŋ nêm lau ŋa biŋgêdêŋ.

⁷Aôm têmtac gêwiŋ biŋgêdêŋ ma nêm ŋalêlôm kêmoatiŋ tôŋ kêtu biŋ alôb-alôbŋa. Amboac tonaŋ Anôtô, taŋ kêtu nêm Anôtô naŋ, geŋ oso aôm ŋa niptêkwi têntac ŋajamŋa e kôlêlêc samob su.

⁸Lakisia to môsê ma samboa ŋamalu kêsa aŋga nêm ŋakwê. Êsêac sêjam wê sêŋgôŋ andu, taŋ sêgêlôŋ ŋa bôc ŋajabo naŋ, e gêgôm aôm têmtac ŋajamanô.

⁹Kiŋ latuŋio sêmoa sêwiŋ lauo ŋagêdô aŋga nêm andu. Ma nêm awê togêlôŋ gold Opirŋageŋ kêkô aômnêm anôŋa.

¹⁰O latucoenec, matam ê aê ma ôkêŋ taŋam ŋoc biŋ. Ôliŋ nêm lau to tamamnê andu siŋ.

¹¹Ma embe kiŋ têtac êkac eŋ êtu aôm laŋômanô ŋajamŋa, naŋ ôkêŋ êwiŋgeŋ gebe eŋ kêtu nêm ŋatau.

¹²Lau Tirusŋa oc sênsuŋ awa êndêŋ aôm. Ma lau tolêlôm oc têtu kêka-kêka gebe aôm ôlic êsêac ŋajam.

¹³Kiŋ latuo gêmoa andu kiŋŋa ŋalêlôm togêlôŋ ŋawasi laŋgwageŋ. Ênê ŋakwê sêwa gam gold gêwiŋ.

¹⁴Êsêac sêwê eŋ, taŋ kêsô ŋakwê talô-talô sa naŋ, dêdêŋ kiŋ sêja. Ma sêwê ênê sakiŋwagao toôŋgeŋ dêdêŋ kiŋ sêja amboac tonaŋgeŋ.