Mbouŋ To Yes Israela 148:3-14

³Aaz ve kaiyo, apaiti! Ve yam pitum tau araŋ ila sambam saamba na paam, apaiti.

⁴Sambam tau igheen saaŋa le saaŋa kat na, upaiti! Ve yaa tau igheen izala saaŋa na paam, upaiti!

⁵Gabua tawe tisov tipait Yoova eeza, o poia. Pasaa i isaav, ve yes tivot itaghon i tauu aliiŋa.

⁶I ighur zi tigheen ila niazi niazi, leso tigheen ta sewe taghon taghon gha ila. Saveeŋ tau i isavia iŋarui zi na, ene igheen pataghaaŋ. Irau tizoora mako.

⁷Yam gabua tau aleep izi taan na, apait Yoova! Ve yam gabua to te loolo tau tapirimim tintiina ve aleep mazavan na paam, apaiti!

⁸Lalaav waaro, tomania ais, naghavghavu, uwam, ve yaghur tiini tau avotvot itaghon Yoova aliiŋa na, yam asov apaiti!

⁹Yam loloz ve nugh mbua, ve yam wal tau anoŋamim popoia, ve ai to su paam, asov apaiti!

¹⁰Ve yam ŋgai to nughei, ve gabua sagsagŋa to su, gabua tau akakarau ila taan, ve man tau arovroov na, apaiti!

¹¹Yam kinik, pooza, ve daaba, tomania yam tamtamon to nughmariŋ, asov apait Yoova!

¹²Yam zitamoot ve zilivaa paghpaaghu, tomania zikooŋa ve yam geegeu paam, apaiti!

¹³Yam asov aat apait Yoova eeza. Pa i mon ta eeza tiina le tiina kat iliiv gabua naol isov. Pooz tooni tomania tapiri ve poia tooni iliiv gabua naol isov to sambam ve taan.

¹⁴I ipalot tamtamon tooni, tauta aazne tiyooz ariaaŋ. Tamtamon tooni tau lolozi isaghavu ariaaŋ ve titaghon eez tooni na, i ipakur zi ve igham varuzi imin tiina. Pa i loolo igheen kat to yes Israela. Aleluia, tapait Yoova!