Sabóor 148:3-14

³Màggal-leen ko, yeen jant beek weer wi, màggal-leen ko, yeen mboolem biddiiw yii di nes-nesi.

⁴Màggal-leen ko, yeen asamaani kaw-li-kaw, ba ca ndox ma tiim asamaan ya.

⁵Nañu màggal turu Aji Sax ji, kii kat a santaane, lii lépp am.

⁶Moo leen samp, ñu sax ba fàww, mu dogal ko, te du toxu.

⁷Nangeen màggale Aji Sax ji fa kaw suuf, yeen ninki-nànkay géej ak xóote yépp,

⁸ba ca melax yaak doj yu sedd yay taw, ak tawub yuur akub lay, ba ca ngëlén yu mag yay def ndigalam.

⁹Màggal-leen ko yeen tund yu mag yeek yu ndaw yépp, ba ci garab yiy meññ ak garabi seedar yi,

¹⁰ba ci mala yépp, yu àll ak gépp jur ak luy raam ak njanaaw,

¹¹ak buuri àddinaak xeet yépp, ak kilifa yeek njiiti àddina yépp,

¹²xale bu góor ak bu jigéen, mag ak ndaw.

¹³Màggal-leen turu Aji Sax ji, moom doŋŋ la turam kawe, darajaam tiim asamaan ak suuf.

¹⁴Moo dooleel ñoñam, wóllëreem ñiy mbooloom bànni Israyil, xeet wi mu xejjoo, di ko màggal. Màggal-leen Ki Sax!