Mboe 83:1-11

¹Mboe ki Asap O Anutu, kwom imun paso? Ur nim mi maane pepe!

²Re. Kom koi bizin kalŋan izalla mi tikam kumbun pa malmal. Zin wal ta tiurur koi pu na, nin se ma tiso tilip pu kek.

³Mi wal ku ta nu lelem pizin ilip na, kom koi bizin timburmbuuru pizin mi timbuk kan kiizi.

⁴Mi tisombe: “Ou, kamaŋga ma tala takas zin Israel ma timap kat. Naso toono kizin imbot sorok mi zan imap.”

⁵Ŋonoono kat. Kom koi bizin tilup lelen mi ŋgar kizin ma iwe tamen, mi tiparmbuk sua pizin be tikam malmal pu. Zin wal ta kembei:

⁶Zin wal ki lele pakaana ki Edom ziŋan Ismael popoŋana kini, mi zin wal ki lele pakaana ki Moap ziŋan zin Agri,

⁷mi zin wal ki lele pakaana ki Gebal ziŋan zin Amon mi Amalek, mi zin Pilistia kan mi kar Tiro kan.

⁸Mi zin Asiria kan timbuk sua be tilae kizin Amon mi Moap ta Lot popoŋana kini na, mi tiuulu zin pa malmal tomini.

⁹Tana amsuŋu be kam mbulu pizin wal tana raraate kembei ta muŋgu kam pa zin wal ki Midian na, mi kembei ta muŋgu kam pa Sisera ziru Yabin su yok Kison na.

¹⁰Nu kas zin su kar Endor, mi uri kizin timbot sorok su toono kembei ta te ma tibuuzu.

¹¹Tana zin bibip ki koyam koi bizin na, kam mbulu pizin raraate kembei ta muŋgu kam pa Oreb ziru Zeeb na. Mi zin peeze kan kizin ta kembena. Koto zin kembei ta kam pa Zeba ziru Zalmuna na.