SALMOS 83:1-11

¹¡Toteco Dios, amo san xitlacacto, niyon amo san xitlachixto quema timomaijtohuaj! Monequi xitechnanquili huan xitechmanahui,

²pampa mocualancaitacahua tlahuelchihuaj hasta queja nanalcaj huan mohueyimatij ica ta.

³Inijuanti tlahuel quimatij quejatza quitlalise tlaquetztli ica motlacajhua. Huan quisencahuaj quejatza quichihuase para quinmictise tlen tiquintlapejpenijtoc.

⁴Huan quiijtohuaj: “Ma tiyaca tiquintzontlamiltitij nochi nopa israelitame para ayoc ma elica se tlali ica itlacajhua. Huan ayoc quema quiilnamiquis itoca Israel.”

⁵Ya nopa tlen quisencajque san sejco quema mosentilijque para mocamahuise. Quena, san sejco quichijque se tlajtoli para fiero mitzchihuilise.

⁶Nopa tlacame elque iixhuihua Edom, Ismael, Agar huan Moab.

⁷Nojquiya inijuanti hualajque tlen nopa tlaltini Gebal, Amón, Amalec, Filistea huan Tiro.

⁸Huan nopa tlacame tlen tlali Asiria nojquiya mosejcotilijque ininhuaya. Nojquiya iixhuihua Lot.

⁹Xiquinchihuili san se queja tiquinchihuili tlali Madián ehuani, o queja tijchihuili Sísara huan Jabín ehuani ipan atemitl Cisón.

¹⁰O xiquinchihuili queja tijchijqui ica mocualancaitacahua ipan tlali Endor. Inijuanti inintlacayohua mocajque tepejtoque tlalchi huan elque queja abono para tlali.

¹¹Xijchihua para nopa tlacame tlen tlahuel tejtetique ma miquica queja Oreb huan Zeeb quinmictijque. Huan nojquiya xijchihua para inintlayacancahua ma miquica queja nopa tlanahuatiani Zeba huan Zalmuna.